設計圖片：四叔抱三孫係「西部教學大樓」前合照
中大勢現88層高樓！八方講既，唔係中大將會起楝「真正」樓高88層既建築物，而係好大機會會出現一層「88樓」。八方講既野其實一D都唔難明，八方收到料，話中大新建成不久的校園西部教學大樓，將會命名做李兆基樓。年初四叔旗下恆基既天匯跳層事件，相信大家都仲記得。西部教學大樓正名為李兆基樓後，相信不難會出現G、1、2、3、5、68、88既樓層數。
最近四叔十分頭痕，南生圍個發展計劃12月18日個城規會既批準就會到期，12月12日就有大班南生圍友入去曬冷，反對四叔起豪宅。新界東北的馬屎埔又搞左次音樂會，擺明向四叔係果度既發展大計說不。最大劑既係代母事件，佢個仔李家傑去美國找代母產子，連下三城，仲豪到派一萬蚊利是俾所有恆基員工，風光無限。結果俾警察查，原來違反左香港法例。咁多爭議，點解中大仲會俾果棟樓改名做李兆基樓？
原來呢筆捐款中大早係2005年已經收左，只係當時校董會無公佈。西部教學大樓原址李達三樓，當時學校為求發展，無乜諮詢就決定拆左李達三樓佢，起座玻璃幕牆的建築，成楝野完全唔配合周圍既環境，係百萬大道望過去，無情情有舊野高過圖書館。八方估計，學校當時可能為減少爭議，所以咪唔同D中大人講。
點知去到2010年，座大樓都已經運作緊，校方卻發現命名儀式愈拖愈大獲。五年之間，有港大「李嘉誠醫學院」事件，中大歷「遵義五年」更加唔洗講。本來新官沈祖堯上場，應該可以食住個勢順利命名啦。但係輪到四叔唔爭氣，又天匯又南生圍又代母，社會上更加人人都識講地產霸權，依家先黎命名真係自爆。
不過從正面的角度去諗，李兆基俾錢中大命名一座教學樓，都好過捐個書院既，話唔埋D人會同兆基創意書院撈亂。再者，呢座樓同四叔都算有緣。佢代表左中大拆舊建築起玻璃高樓既發展主義既時代，係發水上面，都同出面D私樓有得揮，成座大樓實用率只係得五成。另外，大樓落成之後，一直俾人話貨不對辦，例如玻璃幕牆唔見左，原來係因為唔夠錢，真係反映到最近要求規管售樓書的社會現況。位處係西部教學大樓既法律學院，更加可以幫四叔研究一下代母既法律問題，等四叔唔洗咁煩。全港中大獨有的神學院，都可以幫幫手疏解一下代母呢單上面既天主教同基督教爭議。等四叔可以係正式命名典禮當日，名正言順帶埋三個孫同徐子淇，最緊要係叫埋勞苦功高既代母，一齊黎中大見證命名呢。
後記：有同學傳來相片，話呢楝樓仲好鬼side電，夜晚都燈火通明既。
