幾年前，大量一線泰國足球員去到印尼聯賽揾錢，當年泰國聯賽正處混亂階段，印尼聯賽收盡東南亞足球精英，沾沾自喜，自稱『東南亞第一足球聯賽』。今日，一線印尼足球員去到泰國聯賽揾錢，好嘅外援去晒馬來西亞揾錢，風水輪流轉。
泰國3個級別嘅職業足球聯賽搞得有聲有色，短時期內有重大進步，而印尼末有好好把握住機會，更鬧雙胞搞到傷痕累累。
但鬧雙胞並非印尼人專利，泰國亦係『過來人』。2006年至07年賽季，泰國足球聯賽曾經存在2個最高級別之足球聯賽，一個係政府機構組成嘅聯賽，一個係地區隊組成嘅聯賽，結果球迷選擇遠離球場，2個聯賽成為輸家。
2006年之前，泰國只有一個由地區隊組成嘅足球聯賽（泰國超級聯賽），但並非職業聯賽。呢個時刻泰國體育局創辦，由政府機構組成嘅聯賽出現，打著『職業聯賽』之旗號，同傳統聯賽分庭抗禮，本來當年泰國超級聯賽入座率已經唔好，鬧雙胞後就更差。新職業聯賽倉促創辦，欠缺組織、機制，財政亂七八糟，兩個聯賽互相攻擊，球迷走得就走，欠薪事件時有發生，迫使大量一線泰國足球員「逃亡」去到印尼。
因為泰國足球陷入低迷，最終雙方和談終結「雙胞鬧劇」，泰國足球聯賽合二為一後愈搞愈好，泰國足球關注度上升，球迷入返球場，球賽質數上升，贊助商返黎，社會重新關注泰國足球，雖然泰國與印尼足球水平接近，但印尼絕對可參考泰國做法，若果泰國足球聯賽依然鬧雙胞各有各踢，絕對唔會有今日之武里南聯、春武里、曼谷玻璃，武里南聯、蒙通聯都唔會擁有龐大支持者。
現時泰超、泰甲、泰乙三個級別都係職業聯賽，三個級別可以註冊6個外援及一名亞援，以泰乙為例，就有70隊以上分咗唔同地區比賽，競爭力好大，令到唔少青年人有發揮機會，唔少青年人都係踢泰乙被發掘，加上泰國足運嘅宣傳見效，社會又支持，亦多咗球迷支持，多咗商家支持，多咗人踢波揾食，令泰國職業足球聯賽步入正軌。雖然武里喃聯試過打入亞冠8強，不過其實泰超暫時只得幾隊稍稍超班，部分球隊實力可能同港甲咁上吓，而泰國聯賽暫以外援為主，泰國職業足球聯賽路搞咗未夠10年，仲有進步空間，現時泰國足球嘅目標係要衝出東南亞，泰國足運同亞洲一線仍有一段距離，仍須努力。