立即捐款

Momay

我係熱愛足球嘅油漆佬。 網誌

體育

去尼泊爾尋足球夢嘅非洲外援

去尼泊爾尋足球夢嘅非洲外援
廣告

廣告

如果講南亞地區足球風最熱嘅地方,應該就係尼泊爾,不過尼泊爾足球並非南亞勁旅,點解呢?我諗,佢地自己先知喇。近年不論睇南亞錦標賽、亞洲挑戰杯預賽,尼泊爾國家隊都係比到我一種感覺,好熱血,全隊齊心上下,行軍速度快,只可惜,真係得個快字,組織力欠佳,尼泊爾國家隊同香港隊患上同一種『病』,【射黎射去射唔出輸精管閉塞症】。

至於尼泊爾國內聯賽,其實有一定歷史,頂級聯賽叫A-Division League(甲A聯賽),1954年成立,2012-13賽季有16支球會參加,比較著名嘅有Three Star Club(三星)、Nepal Police Club(尼泊爾警察)、Nepal Army Club(尼泊爾軍人)、Friends Club(老友)及Manang Marshyangdi Club(馬南)。

今時今日尼泊爾甲A聯賽被外界認為係一個半職業聯賽,有球隊其實差唔多係全職化,有球隊堅持行半職業/業餘路線,因為有些少發展潛力,近年多咗贊助商投資,包括可口可樂、紅牛,但尼泊爾依然未有真正嘅職業聯賽成立,有大贊助商幫手,照計應該有計仔,不過一個職業聯賽嘅成立,要處理好多嘢,首要嘅足球設施係尼泊爾最缺乏,唔少足球設施非常落後,因為地方太窮,根本冇錢整咁多嘢,要可口可樂、紅牛出錢幫手翻新、建立球場?不如養埋你一世?頂級聯賽有時已經要喺啲爛地比賽,甲B聯賽有時更要喺沙地比賽。其次又係冇錢,地方冇錢,乜都冇。

尼泊爾甲A聯賽有一定球迷,但只要收貴少少就會少好多人睇,因為睇得本土聯賽,大部分窮人,冇乜消費力。所以尼泊爾聯賽想改革,都幾難,因為好多自身問題,有球迷更話,尼泊爾有個半職業聯賽已經唔錯。

不過雖然冇乜錢,但甲A聯賽為咗增加競爭,一樣會請外援,呢班外援大多來自非洲,有尼日利亞人、象牙海岸、喀麥隆人等,而且每年賽季都會有近百位非洲外援黎尼泊爾足球尋夢,呢班非洲外援大部分都係希望利用尼泊爾甲A聯賽作跳板,不過事實上,去得尼泊爾嘅外援,大多質素參差,即係大家所說之『重慶托布』,有啲甚至比『重慶托布』更要低一檔,呢班外援喺國家分分鐘只係踢低組別聯賽,為咗揾錢,呢班三、四、五線球員會去尼泊爾揾機會,而另外有啲就係比人昆嘅。

「喂,去尼泊爾踢波啦,一個月有成7-8000美金,環境仲好好添,食大麻冇人理自由自在,而且水準好高,我踢完之後,球技又勁咗,錢都多咗,下個月又加人工喇,快啲黎啦!」

「我有個FD去完尼泊爾踢波,就比中東佬睇中,未到35歲退休,快啲黎啦!」

「屌正呀鳩沖先!」

最後緊係失望啦,「吓,呢度窮到咁嘅?」「屌你老_,呢度明顯養牛架喎,點踢呀?」一名比較待遇好嘅外援,例如效力三星嘅象牙海岸前鋒Léonce Zikahi一個月有千幾美金,千幾咋,已經好過尼泊爾本土最高薪球員Santosh Sahukhala,Santosh Sahukhala一年揾到8,430美元。

有啲千里迢迢黎揾機會嘅外援,好運嘅之後去咗印度乙組、孟加拉超聯(孟聯)、柬埔寨甲組落班,冇咁好運嘅,只可以去斯里蘭卡、甚至不丹,完全唔係下一站中東、日韓、東南亞五國......尼泊爾足球盛事Budha Subba Gold Cup(佛金杯),今年由香港尼泊爾聯合會奪冠,一支由尼泊爾加喺香港揾食嘅非洲外援組成嘅球隊,當中公民外援法圖斯之弟亨利、今季效力黃大洲嘅迪達,都喺比賽中獲得好高嘅評價,大家應該約莫估到尼泊爾甲A聯賽及當地外援水平去到邊。

雖然係咁,但有啲外援卻樂在其中,因為,終於有人欣賞佢,效力三星嘅象牙海岸前鋒Léonce Zikahi話,喺尼泊爾踢波係開心,佢享受過千甚至過萬嘅觀眾向佢歡呼,佢喜歡尼泊爾人,因為佢地大部分好友善,雖然佢冇杜奧巴咁威風,但最少尼泊爾踢足球嘅生捱,令佢留下人生美好嘅回憶。

廣告