立即捐款

Momay

我係熱愛足球嘅油漆佬。 網誌

體育

蒙古超級足球聯賽成為日本人追尋職業足球夢嘅地方?

蒙古超級足球聯賽成為日本人追尋職業足球夢嘅地方?
廣告

廣告

正當全球各地球迷都為歐國盃場內場外而瘋狂吶喊時,其實都有好多地方國家嘅足球聯賽同時都進行中,包括一啲不被主流社會所關注,甚至未達到職業化水平嘅國家官方足球聯賽,例如開League一個月嘅Mongolian Premier League,即係蒙古超級足球聯賽(蒙超)。

由於足球唔係蒙古熱門體育,喺蒙古社會內得唔多太多重視,所以發展得比較緩慢,不過近年情況有所改善,得到各界嘅支持,蒙古本地足球開始普及,球迷人數都有增長,亦有新球場落成令更多人能夠喺一個較為正規嘅場地踢足球,商家亦開始對蒙古足球市場感興趣願意投放資源喺蒙超聯及球隊身上,電視台亦增加直播場次好樣更多球迷能夠接觸到蒙古本地足球。

蒙古足運只係受天氣影響?

只可惜由於受天氣影響,蒙古嘅室外足球活動只能喺五月至十月進行,場數所限大大影響蒙古嘅足球發展,不過打入歐國盃嘅冰島足球情況其實同蒙古有好多相似地方,一樣係全年部分時間不宜進行戶外足球運動,佢哋有賴企業及社會各界支持造就一個可以不受天氣阻礙都可以維持足球員訓練量嘅環境,只不過分別就係個錢字,現時蒙古面對嘅主要都係資金問題,同埋雖然表面上社會開始接納足球,亦多咗商家企業出錢投資支持,但冇人會肯定下一個年頭蒙古嘅足運會係點,冇人會肯定商家企業、政府會唔會繼續向足運投放時間、金錢,講到尾就係蒙古嘅足運仲未被政府重點看顧,因為好多蒙古人都認為社會內仲有好多問題更值得投放精神、時間去處理,好多蒙古人都認為有錢不如拎去扶貧。

蒙古足球員想踢職業足球只有一條路?

青訓重要,但聯賽都重要,即使蒙超聯得到史無前例嘅關照,相比十年前已經有重大改善,今年更有十支球隊參賽,但性質依然只係傾向半職業化,絕大部分蒙古本地球員本身另有正職,以全職業球員身分喺蒙超聯登場嘅蒙古足球員只有極少數,因為份糧太細所以好難維持生活。

蒙古足球員要踢職業足球就只有一條路,就係出國,但冇幾多可以好似Murun Altankhuyag(麥雲)咁可以順利登陸東南亞、歐洲職業賽場,必需要有好大嘅決心、勇氣及家人支持先能夠作出呢個決定,雖然麥雲暫時回流,但佢表明仲會靜候機會希望再次出外踢職業賽,因為不論蒙超聯有幾多改善都只限表面,核心內圍其實冇乜大變化,實在難與外面比較。

外援瘋湧蒙超聯朝鮮國腳都留毛

體驗過歐洲職業足球滋味嘅蒙古職業足球員麥雲覺得蒙超聯依然與外面世界有段大距離,佢恨不得出去有咁遠走咁遠,但偏偏就有外面嘅球員走去蒙古呢個足運發展尚在起步階段嘅國家追尋自己嘅職業足球夢,真係乜人都有。

其實近幾年蒙超聯有幾支球隊都有請職業外援提升競賽水平,好似2012年賽季Erchim FC(#1)就有來自日本嘅中場球員南陽介、俄羅斯前鋒Aleksei Lobsanov(洛巴諾夫)及塞爾維亞嘅中、後場球員Milos Perisic(佩利斯)加盟,南陽介更係史上首位喺蒙古踢波嘅職業足球員,同時另一支球隊FC Ulaanbaatar(FC烏蘭巴托)就更巴閉請來兩位朝鮮球員助陣,分別係參加過南非世界盃嘅朝鮮國腳金明元及年青小將申哲鎮,此舉曾經引起部分國家關注,開始對蒙古聯賽狀況作出報導,可能就係呢個原因,2013年賽季有好多外援球員都去到呢個東亞貧困國家落班,嗰年喺蒙古留過腳毛嘅外援球員有來自日本、加拿大、尼日利亞、喀麥隆、利比里亞、土耳其甚至新加坡都有,亦有前港甲外援球員身影出現過,佢就係踢過屯門普高(香港)、關帝文化(澳門)、吉隆坡FA(馬來西亞)嘅尼日利亞中堅Raimi Ayo Hassan(哈辛),當時佢效力Khoromkhon FC(浩日莫爾 FC),隊友有鮮為人知嘅新加坡足球浪子David Low及日本嘅池田雄大等人,其中香港本地球迷熟悉嘅日本中場球員伊藤壇喺嗰年都加盟咗Erchim FC。

接住嚟嘅兩個賽季都吸引超過二十名來自世界各地嘅外援球員去到蒙古搵食,甚至有關島代表隊嘅球員身影,大量外援球員到來都令蒙超聯水平及關注度上升,所以現時蒙超聯及蒙古球壇嘅改變或多或少同引入外援球員有關。

#1 - Erchim FC台譯''額日西莫'',亦可以叫''熱電廠隊''。

日本球員尋夢之旅

由於東亞盃外圍賽即將展開,蒙古國家足球隊都開始為賽事準備,最近就同蒙古聯賽選手隊踢咗一場熱身賽,最後雙方三比三握手言和,而蒙古聯賽選手隊嘅球員全數都係喺蒙超聯踢波嘅外援球員組成,佢哋分別來自英格蘭、千里達、哥倫比亞、俄羅斯、塞爾維亞、日本、尼日尼亞,其中入選嘅日本球員就有成八位咁多,包括荻野正博、佐佐木瑞穗、山本真也、南陽介 、菱田拓 、石野秀多 、柏木朋也 ,仲有個我點搵都搵唔到漢字日本名叫乜嘅Maru Matsuki 。

自從南陽介 、伊藤壇去蒙古踢波嘅消息新聞吸引日本媒體報導後,日本球員就成為蒙超聯內最常見嘅援兵,而且今個賽季唔止八位咁少,但以上呢批鮮為人知嘅在蒙日本球員有個共通點,就係大部分未踢過任何日本嘅職業足球聯賽,就算有前往歐洲落班嘅經歷,效力嘅都只不過係低組別半職業或業餘足球聯賽嘅球隊,互聯網所得嘅相關資料少得可憐,講到呢到,大家應該心中有數呢班去蒙超聯踢波嘅日本職業球員同蒙超聯大約水平去到邊。

雖然如此,但當中有部分日本球員嘅經歷比較特殊都值得留意,好似效力Selenge Press FC(色楞格出版社FC)嘅後衛山本真也及中場石川清太咁,佢哋嘅故事都非常熱血。

今年住喺北海道札幌市嘅山本真也辭職去到蒙超聯加盟色楞格出版社FC,佢已經四十三歲,但從未踢過任何職業足球聯賽,第一次以職業足球員身分登場,只因為咗實現自己嘅夢想。細個時山本真也已經夢想長大後成為一名職業足球員然後去德國踢職業波,但得到嘅回應只係被對方嘲笑,但係山本真也內心團火依然未熄滅,大學時期就四圍搵機會去日職球隊試腳但都係失敗收場,最終只能向現實低頭做一位學校教師。

「當我回首我的生活,我都是想我為了什麼而存活」(引述hochi.co.jp內對山本真也報導嘅講話內容)

即使做學校教師生活安穩,但佢依然希望有一日可以實踐自己嘅足球夢,而足球浪人伊藤壇嘅故事令佢得到啓發,佢知道色楞格出版社FC要搵外籍後防球員,於是把心一橫就搵伊藤壇搭路,以四十三歲之高齡去到蒙古追尋職業足球之夢,最後竟然試腳成功,成為四十三歲嘅日本新人職業球員及最老嘅日本外流職業足球員,憑住良好表現,最近更入選蒙古聯賽選手隊獲派正選上陣。

而可以踢左右兩路嘅中場球員石川清太就比山本真也年輕得多,今年只有二十二歲,呢位同樣喺北海道出生嘅球員一樣係有個職業足球夢,但即使有強勁嘅速度,身高所限令佢難以投身日本職業足球圈,佢只有154CM,比全東南亞最矮小嘅職業足球員Yohanes Pahabol(巴哈保)仲要矮3CM,但得知色楞格出版社FC尋找外籍球員,於是就立即出國去試腳,結果今次身高冇成為佢嘅絆腳石,試腳成功簽約四個月,成為日足職業外流大軍一員。

誤打誤撞下蒙超聯成為日本人追尋職業足球夢嘅地方,當中有球員喺印尼試腳被諷刺「呢度唔係足球學校呀走啦」,有球員喺黑山乙組聯賽連出場機會都冇,有球員喺德國連業餘聯賽球隊都將佢拒諸門外,有球員喺日本因為講理想被嘲不自量力,有球員喺日本被嘲生得太矮不宜踢波,好彩佢哋願意無視奇異目光繼續追尋理想。即使呢批日本職業足球員對蒙超聯水平實際幫助未必好大,但各種有趣、奇特及熱血嘅故事都令到蒙超聯知名度增加,或者末來會吸引更多質素條件愈黎愈高嘅外援球員到來,令蒙超聯水平繼續提升從而令蒙古球員得益。

廣告