澳門隊聽日會同台灣隊爭第二圈資格，由於本身實力有啲差距，加上分數上台灣著數啲，所以大部分關注賽事嘅球迷都認為台灣出線嘅機會係大啲，但正所謂波係圓嘅，點解澳門唔可以爆冷贏台灣先？
不過現實就係一知道澳門要贏先可以出線真係心都離一離，因為鋒力不足一向係澳門足球隊嘅大問題，對北馬時已經見識到澳門中前場組織力之弱，今次鋒線仲要冇埋歸化兵艾美達，只剩下梁嘉恆、彭梓亨二人可用，睇嚟面對台灣都冇乜可能主攻，只可以做好防守，靠死球角球製造機會或駁台灣後防失誤，唔係唔可以爆冷，只不過機會好細。
雖然入球數字不及陳健星、梁嘉恆，但艾美達都算係近代澳門球壇其中一位出色前鋒，今次佢因為請唔到假要返工所以踢唔到東亞盃第一圈真係非常可惜，但要搵食就真係冇計。喺澳門雖然甲、乙組某些球隊會請職業外援間接提高競賽水平令澳門本地球員受益，不過本地球員都係業餘性質，有時候一週只操一課甚至因為學業及工作問題而長期缺操，令球員未能保持最好狀態，呢個都係澳門足球長期面對嘅問題，球員波底唔差，但環境問題令球員訓練量嚴重不足，亦因為要搵食返學，請唔到假就踢唔到澳門隊，令澳門隊經常好難齊人出戰影響成積。
同香港一樣，澳門都有搵合資格歸化球員去改善澳門隊成積，好似隨隊嘅杜迪亞及艾加本身係葡國人，今次東亞盃第一圈賽事兩位歸化球員都發揮到佢哋嘅作用，而澳甲入面其實都有外援球員可以隨時代表澳門隊披甲，不過歸化球員只係短期止痛，如果源頭冇根治，結果只會一樣。