立即捐款

Momay

我係熱愛足球嘅油漆佬。 網誌

體育

【亞協盃外圍賽】澳台足球齊創歷史

【亞協盃外圍賽】澳台足球齊創歷史
廣告

廣告

澳台兩支半職業足球隊今日分別出戰亞協盃外圍賽賽事,澳門嘅賓菲加以4比2輕取關島嘅流浪FC,呢場波等同加強版澳門隊對削弱版關島隊,因為兩隊都有唔少代表隊成員。而賓菲加贏波後寫下澳門足球於亞協盃外圍賽嘅歷史一頁,就係贏波,上年係輸晒,亦都送首次參賽嘅流浪FC最後一程,下場對主隊多多伊爭出線,雖然普遍球迷認為主隊技高些少,但今日呢三分對賓菲加嚟講係一種激勵,士氣高昂之下或多或少對下場波有幫助。

而台灣嘅大同作客不丹嘅FC德童,大家都冇外援,上半場雙方踢成五五波,Chencho Gyeltshen(辰卓堅贊)及吳俊青都浪費黃金機會,到咗下半場FC德童拎到唔少攻勢,更喺幾乎空門狀態下射中柱,但呢球唔入後就再冇近榜攻勢,結果窿對窿,大同奪得台灣球隊參加亞協盃嘅第一分,而FC德童就迎來繼上屆參賽後第三場和局。對住擁有多位不丹國腳嘅FC德童能夠力保不失都算係咁,因為不丹高原氣候問題大同球員於適應上會比較辛苦,最後十分鐘可以睇得出大同球員體力下降得非常快,球迷就唔應該講「屌咁都贏唔到」呢啲廢話喇,不如八下大同下一場對手乜料好過啦,孟聯勁旅謝赫羅素雖然喺2016年孟加拉超級聯賽排緊包尾,但喺外圍賽面對住大同及FC德童呢類半職業球隊,又可能係另一回事。

廣告