立選雖然過咗，但網上世界依然仲係花生每日吃不夠，好似早幾日一位新東落選人表示香港人「唔配擁有國家」 ，結果引來反對及支持者互片，當中我見到一個幾奇特之現象，有支持該候選人嘅網民就話冇睇過該候選人嘅所有書就冇資格出聲批評，即係話睇晒所有書就有資格出聲？即係話睇少一本同睇少一頁都冇資格出聲？
以呢個邏輯嚟講，即係話睇晒柔彿DT亞協盃七場波都仲未夠資格出聲講隊波有乜弱點同優點，要睇埋柔彿DT喺亞冠附加賽、馬超聯、馬盃、足總盃及友誼賽合共三十七場波，即係話要合符資格最少要花三千三百三十小時或以上，否則收聲。
如果係咁我會立即投降，按呢個邏輯嚟講，從今起邊個話香港波垃圾嘅，都要達到一定資格 - 最少入場睇晒一季港超賽事，包括所有盃賽，要拎埋票尾顯示，先達標可以批評香港係波垃圾，如果唔係就冇資格出聲批評香港波係垃圾。
尋日JDT對登嘉樓足本重溫。
如果你冇睇過柔彿DT亞協盃七場波，睇完呢場，你仲有四十四場波要睇，睇完你先可以批評。