到埗後與郭伯伯通電，他叫我去東堤小築，路上問人找「郭主席」即可。果然大家都知他是誰－－原來他是大名鼎鼎的東堤小築業主立案法團主席。
筆者忍不住無聊八卦，問郭伯伯是如何應對東堤小築聲名遠播的時艱？他說正因為自殺潮，自己才被推出來當主席。燒炭者都孤身一人，他的解決辦法，就是提出至少兩人同住，才可租房，終遏止風氣蔓延。
問：為何你深諳於司法覆核？
郭卓堅：退休前我係政府一部門工作，97 年辭職。
過去只有大律師才能做律政司長，但 97 後卻找事務律師梁愛詩接任。我同好多同事一齊唔做，覺得新政府唔會守法。
我賣左舊屋，攞埋退休金搬來長洲。
問：你記不記得申請過幾多次司法覆核？
郭卓堅：十幾廿次，唔記得喇。
梁國雄係我嘅開山前輩。初時環境未成熟，往往係屢敗屢試，我也一樣跌跌碰碰。
但到現在就不同，我地打嘅官司都好有根據，對民生有莫大影響，都係出於公眾利益。
比如長洲渡輪的收費，不必再補貼坪洲、梅窩的渡輪；還有替補機制。原訟庭、上訴庭都話係政治議題而輸左，但終審法院依然肯受理。
問：現時你有幾多宗官司在身？
郭卓堅：一就係替補機制。
根據基本法第 26 條，港人享有選舉權和被選舉權；第 39 條《公民權利和政治權利國際公約》內的 25 條 B，選舉要普及而平等。如果替補機制可以凌駕以上權利，真普選亦一世都冇。打贏官司的話，普選嘅權利就得以確立。將來我地傾普選，就有案例可依。
二就係取消丁屋，等緊原訟庭審批是否受理。
丁屋既非原居民的傳統利益，也不平等。由黎敦義係 1972 年提出，只是暫時措施，而且有好多漏洞。
中國已經簽署《消除對婦女一切形式歧視公約》，點解女人冇份？而且丁屋政策僅限於政府認可的鄉村。二戰時日軍入村掃蕩遊擊隊，好多村長被殺，冇人敢繼承村長職位。戰後依啲村落，因為冇左村長，不獲政府承認，即使是原居民也沒有丁權，係咪好唔合理？
三就係鉛水事件，法庭不受理，要賠五十幾萬堂費。
敗訴係因為已經有調查委員會，法庭話應該等聆訊結果。但到頭來調查委員會的結論，同我申請覆核嘅理據差唔多。
四就係梁君彥隱瞞英國國藉，但係上屆立會代理過主席。
我絕對唔係因為政治，梁君彥做立會主席才覆核，係佢未當主席之前已經違憲。原來佢上屆未放棄英國藉，就博懵代任過主席。直到今屆要選主席，先肯放棄做英國人。
他掩飾說代理主席唔係主席替身，但你坐係主席位，行使嘅正正係主席權力。否則佢通過嘅法案，點可以成為法律？而家覆核的爭拗點，就係代主席是否等於主席。當律庭裁定佢行使主席權，而未符基本法要求，所有佢經手嘅法案都要推翻，通通要重新審議。
五就係陳浩天被拒參選。
我見陳浩天和梁天琦嘅呈請，都針對確認書、選舉主任和立法會條例。而我作為新西選民，政府唔俾陳浩天參選，剝奪左我選舉權。所以我嘅司法覆核唔同選舉呈請，狀告嘅對象係選管會主席馮驊，用嘅係基本法第 26 條。
「香港特別行政區永久性居民依法享有選舉權和被選舉權」，留意「依法」兩字，點解要特登加依兩個字？
大會堂有基本法圖書館，翻查草委會文件，明確交代「依法」的意思，就是要求政府依基本法，以免將來政府剝奪港人的選舉權和被選舉權。所以贏面好大。
其實梁天琦還可以考慮告選舉主任和香港政府誹謗。葉劉淑儀和無數高官，係港英年代出任入境處長等職位，一定要宣誓效忠英女皇，擁護英皇制誥。佢地係宣誓，而梁天琦只係講。點解政府選擇地話後者信唔過？
問：好多人覺得司法覆核係搞事，浪費時間，浪費公帑。
郭卓堅：請問你一聲，有人係度食白粉，政府可唔可以話「由得俾佢食啦，何必要拉拒咁煩？」
法律就係法律。司法覆核係基本法第 35 條賦予我們嘅權利。
有啲人會質疑，點解過去唔覆核英國政府？因為過去要到英國住幾個月，入稟樞密院先可以覆核到。
問：即使申請到法援，每次入稟都要自掏腰包，交一千蚊存檔費。迄今花了幾多錢？點解要不計代價？
郭卓堅：已經花了十幾萬，仲未計之前提到的堂費。我本來係東堤小築有三個單位，而家賣剩一個。我孑然一人，錢帶唔走，無牽無掛。
依啲官司贏左冇利益，輸就害自己。政黨有時怕得失民心，比如丁屋，得罪幾多人，佢地未必肯出頭，但我真係睇唔過眼。
後記：
郭伯伯建議新東選民，趁三個月限期未完，可以像他一樣，為無法選梁天琦申請司法覆核。
一來陳浩天與梁天琦案情不同（前者拒簽，後者已簽確認書）；二來「打大佬揀最大嚟打」，宜高屋建瓴，從大節著眼，促使法庭解釋「選舉權」和「被選舉權」的定義，制止政府繼續篩選。
行至門口，郭伯伯特地叫住筆者。如有心的市民不懂寫入稟狀，可以找他幫忙。
陳玉峰編著《我反抗故我在——梁國雄司法抗爭二十年》，早有郭伯伯之專訪。是次訪問亦得力自她襄助，至深感荷。