體育

車路士青訓品轉戰馬爾代夫聯賽

廣告
車路士青訓品轉戰馬爾代夫聯賽

廣告

記得前年小國馬爾代夫喺世盃外抽中同中、港一組嗎?當時中國好多足球網站突然有好多「揭秘式」新聞出街,都係話馬爾代夫只有一位職業球員,馬爾代夫聯賽球隊全部係業餘性質,球員各有正職,同其他地方對馬爾代夫足球跟進嘅近況有啲唔同,例如教過菲律賓嘅Simon McMenemy喺2014年去到馬爾代夫執教New Radiant SC(拉迪恩),菲律賓當地媒體話拉迪恩係馬爾代夫其中一支職業球隊,而數耐少少,2008年馬爾代夫首奪南亞錦標賽冠軍,忽然好多印度媒體幫馬爾代夫足球做「揭秘式」新聞,指馬爾代夫有幾支職業球隊,包括VB,你信邊個呢?

馬爾代夫喺足球世界入面同香港都幾有緣,主要係亞協盃經常交手,大家互有輸贏,但相比馬來西亞、印度等球隊,馬爾代夫球隊實力係冇咁高,2013年後馬爾代夫球隊喺亞協盃分組賽都係出局,今年亞協盃斬開5件,馬爾代夫得返個半位,所以Club Valencia(華倫西亞)都要由外圍賽起步,極有機會得一隊馬爾代夫球隊踢亞協盃。

新一季Dhivehi Premier League(馬爾代夫超級聯賽)有8隊參加,雖然末開波,但唔少球隊搵定外援,例如吉爾吉斯國門 Ruslan Amirov加盟United Victory,聖文森及格瑞那丁國腳 Cornelius Stewart加盟 TC Sports Club,日援東風淳加盟升班馬Green Street ,而今年最震撼當地球壇嘅就係車路士青訓品 Daniel Pappoe加盟New Radiant,今年只有23歲,不過 New Radiant並冇亞協盃踢,主力目標都係幫New Radiant拎代超冠軍,貴為亞協盃常客,港譯「拉迪恩」嘅New Radiant喺上年代超只排第5,都算係近年最差嘅成積,除咗一批質量比較好嘅國腳去晒Maziya,TC Sports Club冒起都係一個原因,所以今年簽咗幾位本地國腳同幾位新援加強競爭。

而據當地球迷所指,代超球隊都係職業性質,但有部分球員有兼職,相信只有 New Radiant、Maziya、TC Sports Club 可以稱為真正職業球隊,而史上第一支以職業掛帥嘅馬代球隊係VB,但投資者已經唔玩所以VB降到落丙組變返業餘。而對於AFC考牌官而言,代超有好多嘢都末合格,雖然馬爾代夫好流行足球運動,不過因為土地問題內外好多嘢都遇上阻力,幾乎冇可能搞主客,金錢問題球會又比較難引入高水平外援難以提升比賽水準及本土球員質素。

其實財政不穩亦係馬爾代夫足球其一問題,New Radiant、Maziya 等相對健康得多,最少搵到 makita、milo撐住,好似 Club Valencia(華倫西亞)就喺近年發生過幾次拖糧事件,其中一位苦主叫 Wright Charles Gaye,利比里亞球員,2012年加盟華倫西亞,但一直冇糧出機票錢都冇結果滯留馬累半年,每週只有32蚊美金補貼,事件被外媒報導後華倫西亞先肯出糧畀佢,仲解釋話因為體育部及贊助財政援助方面有問題,當我哋睇到 milo如何將 New Radiant包裝成 New Milo FC時,卻冇留意原來仲有馬爾代夫有球隊連對球員嘅基本食宿都應付唔到。

廣告