【獨媒報導】宏盛閣居民何小姐今日上午返回單位，並打算在單位內張貼「原址重建」字句，但在張貼前已接獲電話通知，指無論單位內外均不得展示相關字樣。她下樓後接受傳媒訪問表示，其後已改掛寫有「我愛宏福」的直幡於窗外，惟同被警員勸喻：「不如你拎返入嚟黐去第二度，或者唔好黐，但係『原址重建』都唔可以黐喺個屋入邊。」警員最終亦要求何小姐移除「我愛宏福」直幡，才可離開單位。
何小姐形容有關指示荒謬：「間屋係我嘅，咁我要原址重建你又話唔得，咁又話唔好黐。好啦，我和應你唔黐啦，咁我黐『我愛宏福』啫，咁你又話唔好咁。我唔知佢哋有咩係好，真係好奇怪呢樣嘢。」
在上樓收拾的3小時期間，何小姐指不時收到電話要求配合警方工作，只剩下少部份時間收拾物品，大嘆「成朝佢都嘥咗好多時間」。她指下午獲安排再次上樓，並會再嘗試張貼字句於客廳，但警方就以危險為由，不准她張貼字句於廁所。何小姐曾質疑「一張A4紙咋喎，有幾危險」，但對方表示：「如果飄咗出去，就會遮住人哋個鏡。」
《獨媒》日前向警方查詢，是否有要求清除「原址重建」、「感謝中央政府」字句，被清除的字句是否違法。警方僅回覆指採取任何行動，均會按實際情況處理。
被問到當局是否應就大火道歉，何小姐認為當局欠居民一個道歉，亦認為當局應先向死傷者作出慰問。她指每當內地發生事故，翌日便有官員下台及道歉，惟香港政府於大火後一直僅稱「唔理想」和「收業權」，仍未有官員問責，認為當局應考慮讓居民處理重建事宜：「你一係放手擺返晒啲善款出嚟，但係你而家就擸晒啲善款，跟住落你公帑。咁其實呢樣嘢係唔合理㗎喎。」她又質疑當局未有向公眾交代驗樓數據的原因：「係咪有啲咩陰謀呢？」