【獨媒報導】政府規管網約車細節早前出爐，提出現階段網約車發牌1萬個，在人車綁定的設定下，網約車車輛及司機數目同為1萬。智慧交通聯盟理事長、前立法會議員張欣宇認為發牌數目不足，並提出若網約車運力不足，或會令更多人駕駛私家車出行，因網約車與私家車屬同一類別：「如果無網約車，你可能會（改為每日）揸車（返工）。比較少日常通勤嘅（人），我唔搭地鐵就（先至會）轉網約車。1萬個牌，政府覺得夠，我哋就覺得未必夠。」
根據運輸及物流局文件，當局指現時大部分網約車司機以兼職形式提供服務，約六至七成司機平均每周工作少於20小時，兩成多司機每周工作20至40小時，餘下約一成至一成半司機以近全職形式提供服務，每周工作40小時以上。
細節出爐前，智慧交通聯盟曾主動倡議，網約車牌配額應為20,500個。張欣宇向《獨媒》表示，聯盟以一名活躍的網約車司機每日工作4小時為例，推算應發牌約1.5萬個牌照，而由於預計將存在不活躍的「殭屍牌」，並考慮壞車維修等臨時無法運行的情況，因此總配額當中，應預留約兩成牌照作緩衝。
未能預測明年司機實際工作時數 籲提早部署動態調整
張欣宇向《獨媒》表示，在看到法案後「感覺有啲落差」、「大家起碼有幾千個嘅落差」，遂即時查看文件有否解釋如何計算出1萬個牌照這個結論，因政府釐定新政策時「唔應該 random，應該有個計算過程呀嘛」。參詳後，張欣宇指政府與智慧交通聯盟的計算方法差不多，惟系數不同：後者按過往營運數據推算，網約車司機每日工作4小時，當局則指網約車司機在發牌後，每日可以工作6小時，因而令推算的所需牌照數目出現差異。
政府最終扑槌只發出1萬個牌照，並在明年8月22日起實施新例，不過條文中提到將設立動態調整機制，容許按情況增減牌照數目，惟實際操作未定。張欣宇建議，動態調整機制應於新例實現之前出現，並設立過渡條文：「如果到時（1萬個）唔夠，你再加發牌都冇咁快，行政亦需要時間調整。唔係嗰陣時就一刀切話1萬個。」
雖然文件引用過往數據時，將每周工作40小時以上，換算每日平均工作5.7小時以上的司機分類為近全職，不過運物局預計修例後，將繼續吸引網約車車主暨司機主要以兼職模式每日平均工作6小時。張欣宇認為吸引車主兼職揸車「應該係嗰政策目標嚟」，網約車運力本質上不應由朝到晚平均分配：「呢個需求唔係平均分配。大家都知道返工放工、落雨嘅時候，嗰個需求係高嘅。到咗夜晚10點、11點打後，需求係低嘅。」張欣宇分析指，高峰期與非繁忙時間的需求相差1.5倍，網約車司機相對以兼職形式工作較為彈性，的士司機則相對穩定：「如果網約車都變咗固定供應，咁我不如發返的士牌，係咪？」張欣宇強調網約車應保持兼職狀態，「我諗呢個係政策目標」、「都係對成個香港嘅交通比較好嘅一個情況」。
他指外地實施網約車管制多年，亦有多處欠理想：「佢後尾網約車同的士越嚟越似，網約車已經係大老闆買咗好多架車，租畀司機跑幾更，令到網約車彈性功能無咗，真係完全同的士定位差唔多。所以點解要人車綁定，強調佢係一個兼職狀態。」
不認為的士與網約車屬零和死局 籲掌握實際數據調整牌照配額
對於外界關注會否增發牌照，除日後間接調查假日司機有否改於平日使用路面外，張欣宇表示，曾向當局建議直接根據候車時間、接單完成率，及司機上線時數等客觀數字，作出增加配額的考量：「一有呢啲數，你即刻可能知道佢做到幾多運力。依家需求講緊（一日）12萬（程車）呀嘛，呢1萬個（網約車）係咪可以做到12萬（程車），到時一睇就知。你到時做唔到嘅，咪要加囉。」他認為屆時要由「數據說話」：「有一個公開數據，同頻密去調整，呢個就好重要。」
至於的士市場，張欣宇指今次修例不會影響的士業界的收入，因為網約車在本港「一直存在」，在規管後亦不會令其數目增加：「絕對唔會影響的士行業嘅收入，大可不必有啲咩擔憂。」
被問到修例後的贏家及輸家誰屬，張欣宇希望是「平穩」，稱留意到運物局局長陳美寶亦表示今次修例是起步，個人希望沒有輸家及贏家，「平穩過渡係最好嘅」：「依家仲有條件做到，雖然佢講咗個數字係1萬出嚟，但係如果有調整機制，都係可以做到。」