啟德體育園開幕後，為知名樂團跟歌手提供一個新嘅演唱會場地。政府於體育園開幕前曾安排多場演練，力求配套運作暢順。然而真正嘅挑戰依家先開始，因為演練係試唔到前往邊境嘅交通壓力。鐵路口岸開放時間甚少因個別活動而延長，尾班車都唔會延遲開出。運輸署尋日公佈嘅新聞稿更特別呼籲「過境旅客盡量使用港鐵服務」，當鐵路公司駐重兵於啟德及宋皇臺站，甚至拍埋Reels讓大家讚嘆鐵路系統高承載力；但其他轉車站又接唔接得住一批批轉車人流，特別係需要「趕死線」嘅過境乘客呢？
在流動 在流動（客流）就如咖啡因作動
啟德體育園啟用前，紅磡香港體育館一直係大型演唱會舉辦場地。紅磡站一帶本身係一個大型交通樞紐，鐵路方面本身有東鐵及屯馬綫，乘客可以無需轉車就能前往新界以及邊境；道路交通毗鄰海底隧道轉車站以及紅磡站巴士總站，來往港九各地都非常方便。再加上巴士公司安排散場巴士路線，散場安排運作多年能大致滿足唔同乘客需求。跨境乘客可以於紅磡站直接搭東鐵前往羅湖站，簡單而言「上到車就贏」。
相比之下，啟德體育園雖然位處市區中心點，但由於整個啟德發展區設計更為依賴鐵路，鐵路接駁服務更為關鍵。規劃啟德及宋皇臺站時，早已考慮日後體育園啟用後帶嚟嘅人流，所以車站站體、出入口，乃至動線設計已經預得好鬆。但除非乘客目的地係新界西北或者沙田區，否則乘客去港九各區、新界東以及邊境，都需要前往鑽石山、何文田、大圍及紅磡等轉車站，轉乘其他路線先能夠前往目的地。
我與你 趕返屋企 想休息就瞓
散場人潮之所以係人流管制一大挑戰，在於觀眾入場前可以選擇於唔同時間前往場地附近等候，甚至用膳，客流相對分散。但散場時，除非第二朝唔駛做「愛返工力量」嘅黎生，否則大家嘅唯一訴求就係「趕返屋企想休息就瞓」，故此散場客流更為集中。
鐵路公司安排唔少人手，於啟德及宋皇臺站協助疏導乘客，合理不過。但屯馬綫其他轉車站，又有無需要安排額外人手應付呢班突如其來嘅散場客？鐵路公司除咗明言為東鐵北行加密班次外，於鑽石山及何文田站能夠轉乘嘅觀塘綫又有無同樣加密班次？大家希望花咗319億興建嘅啟德體育園，活動可以「長做長有」，但咁同樣意味車站人手、鐵路班次都要「長加長有」，方能維持服務水準。鐵路公司應該點部署，先能夠讓車站及鐵路運作暢順，以對應體育園接踵而來嘅觀眾呢？
轉車ing 心情就像是 坐上一台噴射機
唔同樂團及歌手有來自五湖四海嘅樂迷，總有個別組合特別受大中華地區觀眾青睞，特別有華語歌曲作品。
Coldplay以後啟德體育園將迎接謝霆鋒、五月天去到周杰倫，更多來自中國大陸嘅樂迷嚟到香港睇演唱會。預期會有更多觀眾睇完騷之後，一窩蜂北上至邊境口岸，加重子夜時分嘅跨境交通需求。鐵路比起跨境巴士或直達邊境嘅散場巴士路線嘅載客量高，運輸署因而呼籲跨境旅客搭鐵去邊境口岸。但鐵路口岸唔會貿然延長運作時間，乘客就需要睇住隻錶做人了。
宋皇臺及啟德站經大圍站前往羅湖站嘅尾班車，分別於晚上10:59及11:01開出。過境乘客固然有責任知道尾班車開幾點，亦應預留足夠時間由場館前往車站。但常言道「計劃及不上變化」，即使預鬆咗時間離場，但因沿途實施人流管制下遲咗入站，搞到搭唔到接駁往羅湖站嘅尾班車，最後只能到上水站再轉276B或N73巴士。相關轉車站如大圍或上水，有無足夠人手應付呢班「搭唔到羅湖站尾班車」嘅人潮呢？
留唔留低聽埋首Encore先走，以致能否趕上鐵路尾班車，唯有請觀眾「貴客自理」。但畢竟啟德體育園作為新場地，唔同類型活動嘅觀眾組合、散場交通模式選擇，相信都要實際運作一段時間先能夠掌握實際趨勢。點樣能夠於適應期內做好啲，讓乘客睇完Amazing嘅表演後能夠有個以合理歸途為完美晚上作結，同時唔會讓前線從業員疲於奔命，鐵路公司、其他公共交通營辦商乃至運輸部門都要好好部署規劃。
（本網歡迎各界投稿，文章內容為作者個人意見，並不代表本網立場。）