撰文：陳珏明
攝影：陳珏明
政府早前密集式「放風」將DQ（取消資格）大批民主派區議員，其中包括馬鞍山富龍選區的民主黨曾素麗。她在7月初宣布辭職，並在社交網站專頁發文，連說三句「對不起」，為未能完成本屆任期、未能履行參選政綱及對香港種種荒謬卻無能為力，以至辜負選民期望感到抱歉。
曾素麗的議員辦事處7月底正式結束，但她只短暫「告別」一個月，即以另一身份重返社區，在區內富輝商場開設名為「鹿鞍山」的小店，除售賣「香港製造」的產品外，更設社區自助服務區，希望續為街坊提供服務。
與其陷入恐懼 化被動為主動
她說當日面對政權的「放風」，認為與其陷入恐懼與壓力，不如化被動為主動，故此決定辭職，當時雖然未有下一步的計劃，但仍希望能有其他方式跟社區維繫連結。事實上，曾素麗本身就是馬鞍山人，從小已在區內長大，就讀的中學更是在她本身當議員的選區，及後亦曾在區內另一區議員鄭則文的辦事處實習與工作，「自己都係住呢區，落街食飯見到好多街坊，所以就算辭職，都離唔開個社區。」
在辭職後短暫「告別」，她開始尋索留在社區的可能，「最初有諗過做食店，但發現執行上有困難，始終會比較困身，街坊嚟搵你幫手填表申請消費券，你煎緊嘢，唔通叫對方慢慢等？而相對上，零售生意似乎較易起步。」
由議員轉型從商，可以想像必會面對不少新挑戰，「慶幸係自己大學本身讀marketing（市場學），唔知係咪最終幫到啦，亦感恩有唔同朋友俾意見，但有啲實際問題係做落你先會知，例如我訂咗個雪櫃，但送到先發現入唔到商場電梯，要搵方法運入舖頭。」
取名「鹿鞍山」 提醒分辨是非
曾素麗坦言短期目標，是希望店舖生意可以先做到收支平衡，支持營運，自己人工反而未有考 慮，在未來才再作打算。至於店舖取名「鹿鞍山」，她解釋是因為現時香港荒謬的事實在太 多，希望藉店名提醒自己和香港人，要識分辨是非黑白對錯。而小店就主打售賣香港製造的產 品，包括港產手工啤酒，望為馬友提供多點良心產品以供選購。鹿鞍山已於9月5日開始試業。
對於未來身份不同，曾素麗笑言亦可以令她放下「包袱」，「以前係議員，始終要維持議員形 象，亦有議員要跟嘅操守，要有禮貌等等，咁以後應該冇咩所謂咗，可以同街坊大家關係更加緊密，會好似朋友關係咁，其實家陣自己已經成為大家一分子啦，係同聲同氣。」
她說當日辭職後，不少街坊跟她道別，說到當時的不捨，雖事隔逾月，但仍令她有點眼泛光， 「畢竟做咗兩屆，同街坊大家有感情，亦相信係大家對社會有不滿情緒，加深咗個不捨。雖然現時不再有區議員身份，但仍希望利用「鹿鞍山」的空間，繼續幫助區內街坊，「如果要處理社區問題，咁好彩仲有唔少『朋友』冇辭職，咪搵佢哋幫手跟進，但更加想係令呢度（鹿鞍山）變成大家嘅聚腳點，有問題就嚟傾吓，大家互相幫助搵個解決方法出嚟，希望好似織網咁，凝聚到大家同打氣。」