有傳聞全民檢測期間，將會同步推出禁足令，家中只係可以派一個成員去「超級市場」買必需品，其他非必要嘅舖頭就需要閂門休息【註1】。但何謂「超市」？某啲無超市嘅區封城期間係咪要跨區買嘢？本研社就有關措施進行研究，檢閱符合現行政策定義嘅超市，經反覆盤點之下共712間，比起現時政府在地理資訊地圖（672間）的超市數字為多。
粗略估算，如果禁足期內一間超市只開9/10am-7/8pm（10小時），每戶只有1人可外出超市購物，全港有270萬戶人要去712間超市購物排隊1小時，那麼平均每間超市同時人流每小時將高達372人，明顯都是嚴重的超負荷。
2022年超市清單分析
究竟有那些超市會是「禁足限定」？根據《預防及控制疾病條例》（第599章）指引：「超級市場為有生鮮食品、並非生鮮食品的食物、飲料及家居用品售賣的自助商店。」【註3、4】雖然「生鮮食品」被批評定義含糊，但按上述599章嘅定義，仍然能粗略統計到符合條例要求的「超市」：
【2022「超市」清單】
惠康 (怡和)／284間
百佳超級市場 (長和)／133間
U購Select (華潤)／82間
fusion by PARKnSHOP (長和)／62間
Market Place by Jasons (怡和)／41間
百佳超級廣場 (長和)／18間
Taste (長和)／14間
AEON STYLE (永旺)／10間
International by PARKnSHOP (長和)／9間
Don Don Donki (唐吉訶德)／9間
一田超市 (新鴻基)／9間
759阿信屋超級市場／5間
soda mall 首達百貨 (九建)／4間
City’Super (華潤)／4間
AEON SUPERMARKET (永旺)／3間
FRESH 新鮮生活 (建華)／3間
UNY(恆基)／3間
瀛木超級市場 (股東包括苑瓊丹)／2間
L'Azur Gourmet／2間
崇光超市 (利福國際—劉鑾鴻持有)／2間
food le parc／2間
3hreesixty (怡和)／2間
taste x FRESH (建華X長和)／2間
HKTVmall 超級市場 (香港科技探索)／2間
Gourmet／1間
great Food Hall／1間
Oliver’s The Delicatessen (怡和)／1間
APITA UNY (恆基)／1間
大將超市 (富臨)／1間
比較約十年前消委會進行嘅「雜貨零售市場研究報告」（2013）調查【註4】，以一站式買各種生鮮非生鮮食物同家品作為介定超市嘅標準，統計出2013年全港共有673間超市，即十年間香港嘅超市約增加咗50間左右。
十年來增加嘅超市，唔再係來自於最大幾間財團（惠康、百佳以及華潤），反而係Don Don Donki（+9間）、過往主要做零食再而提升部分做超市嘅「759阿信屋超級市場」(+5間)，仲有傳統長和以及怡和以外嘅大地產商新經營嘅一田超市（新鴻基 - 共9間、UNY 恆基 - 共4間、九建 soda mall +4間）、亦有近年社會事件惹來爭議的建華（FRESH 新鮮生活 - 共3/5間）及富臨（大將超市 - +1間）。
「超市」原來唔係超市？
然而，按上述第599F嘅定義，要有齊 (1)「生鮮食品」、 (2)「並非生鮮食品的食物、飲料」，及 (3)「家居用品」售賣先算超市。唔少市民當作超市，甚至名稱都包含「超市」兩字嘅店舖，喺現有599章的標準下可能都唔屬於超市：
無賣「生鮮食品」 （如新鮮蔬菜、肉類）：阿布泰國生活百貨 (24店)、759阿信屋 (166店)／759阿信屋急凍食品市場 (2店)
無賣家居用品：家興超級市場 (7店)、大生生活超市 (47店)、佳宝食品超級市場 (90店)以及大昌食品市場 (53店)、馬莎食品專門店 (5間)【註5】
如果再嚴格按此定義，有可能連當中唔少「U購Select」超市都唔可以計算喺超市之列，因當中唔少都欠缺售賣「家居用品」。故此以為禁足期仲可以行下阿布泰，就好可能會大失所望喇。
不平均的超市分佈
其實以為有超市就代表方便係個過度單純嘅睇法，唔少住宅區都冇超市，往往依靠地區小店補足生活需要，若果喺封城期間閉門，將對當區居民造成不便。
兩家龍頭超市集團（包括其姊妹店）—百佳（237.5店）【註6】同惠康（328店）【註7】，加埋總共有565.5家分店，佔現行超市78.9%，似乎遍佈港九新界。實際上好多稍為偏遠「超市盲區」，例如皇后山邨、南丫島、茶果嶺、鯉魚門三家村、新田、古洞、流浮山等地方都無超市紀錄。整個大嶼山除咗東涌、愉景灣、梅窩外都冇超市，要前往最近超市就可能需要半個至一小時鐘車程。
呢啲區域嘅居民部分可能依賴網購貨物派遞。是次限制會否牽涉貨物派遞？一些無法在超市營業時間光顧的人士，行動不便嘅長者、傷健人士、隔離人士等，也可能依賴網購貨物派遞。依靠批發商、分銷商供貨的社區機構、院舍會否受貨物派遞限制所影響？若如消息指，由政府增聘人手去做派發物資，又係咪會真係深入鄉村市郊？
一籃子的隱藏技術問題
多家超市分店都因為疫情影響，人手有限之下暫停營業，而且縮短咗營業時間，未必可以應付禁足令期間短時間營業嘅龐大人流，反而增加人群聚集，適得其反。到時，隨時出現一條長長嘅隊排超市，另一條長長嘅隊排隊強檢嘅尷尬情況。而且超市的供應靠的不只是超市員工，而是來自各行各業的採購、物流、銷售、保安、科技、倉存、製造、加工等行業，政府屬意只給712間超市售賣食品以及日用品，萬一出現斷層也將會在禁足期間更加混亂。
後記
以上調查只屬根據現行法例對超市嘅定義而進行的研究，亦可能有部份小型超市符合準則但未能充足包含，實際執行禁足時又會唔會包含其他類型商舖，同全民強檢一樣暫時都仲係未知之數。
參考來源：
【註1】傳港府月中以後實行封城禁足強檢 股市購糧可豁免，《自由亞洲電台》
【註2】《2022 年預防及控制疾病 ( 規定及指示 ) ( 業務及處所 ) ( 修訂 ) 規例》
【註3】疫苗通行證2月24日實施 入599F表列處所須打針！甚麼情況可豁免？，《Ufood》
【註4】2013年《雜貨市場研究報告》，消費者委員會
【註5】馬莎百貨食品部由於位於百貨公司內，而獨立經營的馬莎食品專門店亦因店內較少售賣家品，未符合有關標準
【註6】惠康屬於牛奶公司集團，母公司為怡和集團，集團其下分店還包括3hreesixty、Market Place by Jasons、Oliver’s The Delicatessen
【註7】百佳屬於屈臣氏集團，乃長江和記實業成員，集團其下品牌包括百佳超級市場、百佳超級廣場、fusion by PARKnSHOP、International by PARKnSHOP、Taste、3hreesixty，taste x FRESH則與建華集團聯營
（本網歡迎各界投稿，文章內容為作者個人意見，並不代表本網立場。）