撰文：Yoko Chong
攝影：Bob、Tong
位於錦泰商場對出的「鞍山茶座」是社企，街坊知道嗎？「鞍山茶座」定位單車驛站，究竟提供甚麼服務？「鞍山茶座」與毗鄰鞍山停車場究竟有何關係？究竟，「鞍山茶座」是否仍有服務馬鞍山77區居民需要的角色？理想與現實是否相符？今次《馬聞》與沙田區議員鄭仲恒一齊探討「鞍山茶座」，以下是訪談節錄：
（馬：《馬聞》記者，鄭：鄭仲恒）
馬：「鞍山茶座」係咪已經填緊表格討論佢續唔續約，同埋係咪上咗區議會？
鄭：其實呢個地方一直都係討論話題嚟嘅，追溯返唔單止係我，陳珮明（區議員）一直都有幫手，咁資料到手喇，合約係3年3年3 年，今年係第3個3年，即係依家已經做咗8年幾，最主要就係，佢依家就地政處通過民政處，同地區人士做circulation（傳閱文件），但其實都唔係個個人都收到，我哋沙田區議會，得我同容溟舟（時任區議員）收到呢份circulation，就算陳珮明都無收到。
當我收到呢份嘢，我即時問地政處攞返有關文件嘅，因為當時俾個circulation入面係得兩頁，一頁係好簡略嘅合約內容，譬如話佢係用直接批出形式俾佢（鞍山茶座）喇，當中入面有咩用途喇，然後第二份就係個地圖，其實啲資料係好唔足夠。
直接批出個logistics係民康促進會話想搞呢壇嘢，咁佢哋就同民政事務局講要搞，然後民政事務局就會俾支持民康促進會，然後民康促進會就會同地政去講，話我想要撻地搞呢啲嘢，民政 事務局已經支持咗，地政個角色只係做執行啫，OK無問題，俾邊撻地你喇，咁民康促進會就會攞到撻地，去做建議書俾民政事務局。
直接批出 ３用途似未做足
我問返啲前輩，當年民政事務局係有做地區諮詢嘅，咁當年區議會嘅區議員係招文亮，而招文亮亦都係民康促進會其中一個董事，睇返佢以前申請撥款時，佢係申報過佢係民康促進會其 中一個董事，個直接批出嘅logistics就係咁喇。
入面嘅文件內容呢，有講係直接批出，以市值租金，跟住之後主要話有3個用途，第1項就係餐廳，依家做緊啦；第2項就維修及停泊單車，維修我就真係未聽過，停泊單車呢，其實喺我上咗任之後，即係2020年，係有居民同佢作出投訴，同地政投訴，話佢嗰度係無位泊單車，佢先至整返個單車架出嚟，咁我就唔知道佢之前嗰7年有無做過呢樣嘢喇；之後第3樣係露天展覽，咁多年啲街坊係未見過有露天展覽，而陳珮明嘅提問當中係有提過，有冇向當局申請時有提過係做展覽，係無嘅。
好多街坊都出過好多投訴俾地政，地政落到去睇，哦，我俾個警告你，跟住之後呢，見佢原來有做返好，咁就算數啦，但係轉頭佢其實又係咁，但繼唔繼續俾佢續約都係民政事務局話事。
時租或過夜泊車 已違條款
咁但係呢，依家大家對佢呢個用地有咁大意見呢，持平啲唔講個組織背景住，第一，佢用呢撻地用嚟做時租，或者過夜泊車，其實已經違反咗個條款啦，因為第一啦，佢係用市值租金，市值租金其實就係根據佢個用途，咁佢個用途係無包呢樣，係有少少欺詐成份嘅，根本就係損害緊公眾利益。
如果我所講全部屬實，譬如話佢做時租、或者做過夜泊車嘅話，佢依家呢個位置係用社企名義去租，咁餐廳收入係入落個社企度，社企去攞88牌（獲豁免繳稅的慈善機構）係基於有一大堆條件。我最基本知道，佢哋嘅收入來源係非牟利，咁但係當如果佢做停車場，係時租或月租，咁嗰筆錢係入落邊一度呢？如果入落社企度，社企係做緊啲唔合規嘅嘢；如果個錢係入落個組織嘅其中一個人入面嘅話，咁其實係⋯⋯成件事係有少少犯法㗎喎，係咪即係報案先至作出調查呢？
另外，最後就其實呢個地方可以有更好嘅用途，好過租俾佢去做餐廳或者俾佢自己做，做個臨時停車場都好。社區會堂啦，我哋呢度最近嘅社區會堂就喺恆安，呢度馬鞍山最早發展其實就係富安，但永遠我哋最需要嘅嘢係無嘅，我哋屋苑內居民要開居民大會，往往都要同中學去租地方， 咁依家疫情期間，其實學校又未必肯租俾法團開會，如果錦泰苑要用社區會堂要去到恆安嘅話，根本無動力去，特登令到個會係少啲人出席。
地政曾發警告 照樣獲續租
馬：之前講咗呢個係個短期租約，佢霸咗撻地幾耐？
鄭：其實今次審批已經係第3個約，已經係8年幾，嚟緊已經係第 4個3年，即3年1次。
馬：咁佢喺過往8年幾有無因為違規俾地政警告？
鄭：有嘅。
馬：除咗警告仲可以做啲咩？
鄭：其實我喺個會上都有問地政處，有無一個權力話同佢取消個租、釘佢取消個租契？佢話有嘅，佢答得好好，但最後要決定時候，可能都要同民政事務局交代，譬如佢依家要審批張租約，地政處都係將呢啲資料俾民政事務局，民政事務局睇完之後，就決定去約呢個機構去租唔租呢個地方俾佢。
馬：咁即係佢犯咗咁多次規，民政事務局都覺得⋯⋯
鄭：都覺得無問題，因為唔係剩係我上咗任先發生，上一屆嘅情況都有，上一屆當區區議員都無去提出呢件事出嚟，當時批出都係問返當區嘅持份者，即係問返招文亮。
馬：咁其實佢租約都咁長啦，即係都有佢價值係度，點解唔使公開招標？
鄭：呢個就係政府批出嘅唔公平地方，你直接批出嘅話，會問返當區人士做返少少諮詢，但諮詢係問返啲咩人？係無個公眾嘅認可性，所以呢樣係針對住不公平地方，同埋真係錯用咗塊地，係濫用，根本唔需要咁大撻地，我其實意願未必係剷走你成塊地，你剩係保留返你餐廳嗰部分，其餘俾返政府用嚟做其他用途都好。
泊車有規定 不多於15架
馬：舉個例，我想用我嘅名義開個社企，可能係賣啲文具俾區內學生嘅，我有咩本錢可以同佢哋競爭呢？因為佢哋依家係世襲咁去壟斷。
鄭： 好多坊間嘅人同我講，其實如果當HA（民政事務局）直接批出塊地嘅時候，其實係永續喇。
馬：即係第一，你踢唔走佢啦，第二，你永遠都改變唔到佢個用途嘅。
鄭：所以我今次做呢樣嘢，我知道係永遠冇任何嘅結果，但我要俾返個社會知道背後嘅嘢係做得咁唔公平嘅。
另外講開泊車位，泊車呢其實有規定不多於15架嘅，但你見有時最旺盛時間係多過15架⋯⋯點解泊嗰度？因為平啲，同埋你泊嗰度係咪食客？
馬：再問多條，其實有冇馬鞍山街坊係支持佢喺度？
鄭：我無收到。
總括而言，「鞍山茶座」的合約期已迫近眉睫，似乎續租的問題都未完全引起77區或馬鞍山區人嘅關注及反對，但這又是否意味住不反對就等同同意呢？香港寸金尺土，土地的運用的確是需要深思熟慮，公眾利益同土地運用兩者能否取得平衡，對於土地資源的分配，市民又有否能力去發聲呢？
鞍山茶座屬社企 提供什麼?
根據民康會的資料紀錄，「鞍山茶座」源於當年馬鞍山區內缺乏食肆及單車停泊位，為了改善社區環境和回應居民需要，2009年民康會向政府提出申請，建議在沙田馬鞍山第77區一幅荒置土地上，開展一個社會企業項目，「鞍山茶座」亦由此時開始創辦。
民康會自2010年起，先後得到民政事務總署「伙伴倡自強」社區協作計劃、香港賽馬會慈善信託基金及恒基溫暖工程基金贊助，開展計劃。
「鞍山茶座」於2013年3月正式投入服務，以傳統茶餐廳模式運作，服務對象主要為馬鞍山第77區居民，以及單車遊客。
隨着政府在新界發展單車徑網絡及相關輔助設施，2014年3月「鞍山茶座」亦重新定位為單車驛站：
＊馬鞍山第77區單車停泊及服務站
＊馬鞍山單車幹道輔助設施
＊推廣單車體育活動的場地
根據民康會資料，單車驛站同時提供：
＊有蓋單車停泊位
＊保安管理配套（保安員、閉路電視及出入登記證系統）
＊清潔保養（專業清洗、打蠟、唧油等）
＊維修（補胎、更換零件等）
＊基本單車維修保養指導
＊單車訓練課程
＊景點及社區導覽資訊
＊工具借用
＊簡單急救用品
＊歇息休憩處（鞍山茶座）