（獨媒報導）社民連前主席黃浩銘等7人，分別被控前年10.20組織未經批准集結罪及參與未經批准集結罪，他被判刑入獄14個月。黃浩銘是案中唯一牆外的人，他在第四度入獄前接受《獨媒》訪問，「坐完監，我就努力『做人』。我自己想生三個，太太想生兩個。」
記者相約黃浩銘做訪問，他已搖頭苦笑說，「我結婚都未夠一年，依家又準備要坐多過一年。」阿銘去年12月新婚，親友、跨黨派和組織的朋友，濟濟一堂對他送上祝福，限聚令下仍喜氣洋洋；不消一年，席上眾人入獄的入獄，離港的離港。
移民成為港人的重要課題，但阿銘選擇留下來，他表明希望開枝散葉，「自己唔生，人哋都會生。生唔生係個人選擇，但我希望多啲小朋友大咗之後，成為好人，加入民主大隊伍一齊爭取民主。」
他自言「我係癲嘅」，認為兼希望每個民主家庭都至少生三個，其中一人參與抗爭，負起坐監的代價，另外兩個家庭則肩負照顧的責任。
上庭前，黃浩銘在法院外舉起五一手勢。
十年前首被控非法集結 十年後同行者有增無減
2008年加入社民連，兩年後成為行委，去年接任主席，回望昔日的自己，黃浩銘形容既幼嫩又勇敢。10年前首次被控非法集結，最後罰款了事。那是2011年3月6日，反財政預算案遊行後，示威者堵塞德輔道中，113人被捕，黃浩銘是其中一人。
23歲的他首次被控非法集結罪，陶君行當時打算「一力承擔」，阿銘不知那來的勇氣，對陶說，「你唔洗同我講呢啲，你唔好英雄主義。我會有我嘅決定，我決定就係同佢一齊並肩同行，所以佢陳情我又陳情。」
初生之犢不畏虎，黃浩銘當時陳情指，仍會繼續做同一件事，並且相信同行的人會越來越多，「十年前預言成真？啱，無錯。」
前年10.20當日參與遊行
批中共出盡飲奶之力鎮壓
前年爆發反送中運動，過萬人被捕，阿銘在運動初期還在獄中，他不斷寫信詢問朋友的看法；出獄後便趕上運動，但亦再次被政權盯上。在訪問中，黃浩銘一再強調鎮壓一詞，「我無諗過鎮壓係咁大規模，可以咁講今日嘅鎮壓同1989年血腥鎮壓，深度、廣度係好類近。共產黨係出盡飲奶之力鎮壓我哋，但唔需要因為咁覺得好灰心好寂寞。」
今次第四度入獄，阿銘要在獄中度過33歲生日，他表示會繼續鍛鍊和多讀書，並家中早已一袋袋的放好12個月的書籍，包括中共黨史、台灣民主歷史和陳獨秀文章選集等。
前一次出獄後接受記者訪問，阿銘在獄中聽的是Supper Moment 的《幸福之歌》，「依家係濕鳩Moment 啦係嘛？」阿銘認為，只要「頂得到」和適應過來，民主運動仍有希望。被問到具體方案，他表示不想隨便拋出概念，但宗旨為靈活多變，和以組織為基礎。
曾投考輔警 3厘米之差名落孫山
當年理大畢業後，黃浩銘本來打算投考政務主任，因為黃毓民的緣故令他加入社民連。十多年來曾任陶君行、梁國雄、岑子杰助理，和社民連職員。他大學時在尖沙咀的一間越南餐廳做侍應，又做過補習老師。
在這以外，阿銘曾經和同學投考輔警，但3厘米之差令他名落孫山，「考唔到原因係因為身高，我過咗驗眼㗎啦」。那名同學的政治立場其實跟阿銘南轅北轍，對方在畢業後亦成為警察。
「嗯，我諗如果我考到，大學畢業就會做見習督察，甚至參與鎮壓。世事就係咁奧妙，就係呢3cm，身高決定命運。」
兌現五年前選舉承諾：對得住每一個投我嘅人
2016年立法會選舉，社民連和人民力量結盟，陳偉業為黃浩銘抬轎，名單取得28,529票未能當選，這亦可能是他最後一次參與選舉。黃浩銘在落敗後曾寫道，「我沒有甚麼可以報答大家，唯一可以的回饋大家的，就是在將來的抗爭路上，你一定會見到我，而我在選舉中承諾要爭取的，我都會繼續努力去做，而且更盡力去做。我說過，即使你會為我敗選而傷心，但你一定不會後悔」。
敗選後的三年間在監獄出出入入，2017年反新界東北案，被控非法集結罪罪成，判監13個月，2018年佔旺刑事藐視法庭罪成，判監4.5個月，2019年佔中九子案串謀和煽惑公眾妨擾罪成，判監8個月。家中有的櫃頂有數個文件夾，裝的是曾被控和參與的官司。在判刑當日，黃浩銘亦認真聆聽判詞。
在五年前的選舉後再次入獄，黃浩銘豪氣不減，他對當年的選民這樣說，「今日我會講，我對得住佢哋每一個，每一個都唔會覺得可恥。喂，你不如問下投畀鄭松泰嗰啲。」
卸任社民連主席 冀確保組織穩定
一場反送中運動，社民連成員相繼入獄，梁國雄、岑子杰、吳文遠和陳皓桓身陷囹圄，連職員謝寄安亦要坐監，曾健成和鄧世禮同有案件在身。「社記」早前換屆，黃浩銘卸任社民連主席，連行委亦不保留，他更提出修改會章，未能履行職務一個月便要離任，「我係想確保組織嘅穩定性，能夠如常運作。」他特別感謝社民連成員的堅忍，和新一屆行委的勇氣和承擔。
「政權可以迫到組織解散，但取消唔到人與人之間嘅關係。」這個暑假很悶人，《蘋果日報》停刊、教協和民陣解散，「612人道支援基金」宣布停止運作。黃浩銘其實一直思考在庭上的陳情內容，奈何形勢變得太快；他有點不知道說什麼好，「想鼓勵人，但人哋係咪畀你鼓勵到呢？嗯，但我都會講我想講嘅，認為啱嘅就可以，唔洗顧慮咁多。」
避唔到，一齊捱
「我哋唔好望住走嗰十分之一啦，我哋仲有十分之九嘅人一齊努力㗎嘛。」在移民潮下，機場每日都是陽關道，「200萬人有幾多人走先？有無20萬？十分之九嘅人無力量嘅咩？」
黃浩銘重申，所謂的「完善」選舉制度，正是中共害怕真正的民意得到彰顯，「佢根本明白，真正嘅民意同佢哋唔同，但如果我哋心裡永遠都記住，2019年區議會選舉就係真實民意，呢個喺未來五至十年都唔會變。」
「你有無諗過離開？」黃浩銘想了想後說，指和太太均十分喜愛香港，「有閃過呢個念頭。我強調，係講緊服刑之後，同其實唔到我考慮。點解要離開呢？如果對我無生命威脅，我都唔會走。」
黃浩銘與前來旁聽的支持者合照。
「搞民主運動就係要一廂情願」
堅守信念，才有走下去的可能，黃浩銘一直這樣相信。「我問你啦，3年後200萬人會有幾多人走咗？100萬？咁即係仲有100萬人未走，唔少㗎，我哋仲有同伴。」
記者質疑，想法有點一廂情願，黃浩銘嘴角上揚說，「我剛剛先畀鄭紀航裁判官話一廂情願，認為四個人、四個人分開唔係共同目的喎。搞民主運動就係要一廂情願，將每個一廂情願擺埋一齊，個個淨係望住政治現實死咗啦。」
「好老實講，爭取民主嘅人，同專制嘅人點調和？根本調和唔到，夏寶龍講得啱，咪鬥爭囉，依家就係考驗我哋嘅抵抗能力。」
2008年到甘肅旅行（受訪者提供相片）
喚中間人「唔好成日嚟叫我哋收檔」
早前奧運期間，香港人在商場為運動員打氣，更高呼 We are Hong Kong 。黃浩銘有感而發，「唔該啲中間人，唔好成日嚟叫我哋收檔，以為咁就天下太平。管治社會係要處理民心，你咁樣做無人服你。」
2008年北京奧運，黃浩銘還會穿上中國加油的T 恤，又曾到內地甘肅旅行。「依家中國係神憎鬼厭，香港人仲要支持對家。正常人要諗下，點解民心思變到咁嘅程度？」
阿銘認為，群眾心中仍有很強烈的香港人意識，分離主義更越來越強；認為中共既然已就國安法立法，「乜都揸晒權，牢牢掌控，畀返個立法會否決權都得啩？香港人一定服氣好多，唔係嘅話，分離主義就只會越捲越大，到時就只有打架。」
這半年來，同路人的心情不言而喻。黃浩銘會飲紅酒減壓，「見到教協咁覺得好唔開心、好無力，公民社會瓦解緊。但酒醒咪繼續努力，唯有係咁。」「真㗎，佢可以瓦解組織，但破壞唔到人與人之間的連結。好似我同你係朋友，佢可以點破壞？」他一再強調的是連繫。
喚妻子最低程度照顧自己
在案件開審前的一星期，離愁別緒份外濃烈，黃浩銘和妻子都鬱鬱不樂。他一向負責管理家中的瑣碎事，早已將各樣交費轉作自動轉帳；又拍下影片寫好備忘錄，教她清潔吸塵機。
「照顧好自己，多多照顧自己，最低程度照顧我就得，唔得閒唔洗寫信畀我，我寧願佢多啲睇電視、去玩同約朋友。」
「退後一步諗，其實我哋都好幸運，比起喺監獄受緊嘅人。上天都畀咗8個月時間我，做一個好丈夫。」審訊首日，在前往區域法院前，黃浩銘和妻子早上一起出門，離別一刻相看一語欲慰難，有懷莫訴苦。相擁，然後道別，這場景，大概是時代下的寫照。
記者：麥馬高