過去兩個月, 梅窩居民被放到一個很特別的審判台, 在這個台上, 我們要回答一些在其他地區的家長不會被問到的問題, 但所有答案都不被接受, 而質問的人卻不需要提供質疑理據, 也沒有充份的反駁理據.

沒錯, 這個就是衝著<正生書院遷入梅窩南約區中學事件>而產生的奇觀.

說是 '觀', 是因為公眾選擇觀看政府和傳媒製造出來的擂台大戰, 政府不想額外投入資源, 把本來可以安好並存的兩批學生放上擂台, 爭奪南大嶼唯一的一間中學校舍. 要維持這個擂台, 就一定要否定 '並存' 這個出路, 而不是要求政府提供理據, 解釋為甚麼非得要犧牲其中一批學生.

說是 '奇', 是因為我們已經聚集民間力量, 整理了人口資料(其實也是政府統計數字), 說明在現有的新學制下, 南大嶼山有足夠人口維持一間結合社區特色, 以及發揮社區資源的雙語學校. 可是無論是個別抑或居民的集體投訴, 政府當局都三緘其口, 沒有就我們爭取原區就學的理據作出反應. 如果我們算錯, 大可跟我們說, 但在政府一意拒絕公開回應的情況下, 公眾繼續用政府不盡不實的數字來審視重辦南約區中學的訴求, 而不是督促政府提供拒絕我們訴求的理據.

我不是家長, 但在這段時間, 我聽到很多家長的辛酸, 以前的, 現在的. 我亦了解到當政府在完全漠視邊陲地區的年代, 梅窩居民如何以自己雙手, 把民辦小學建起來. 後來幾經周旋, 好不容易才爭取到南約區中學, 也是有居民參與, 用自己雙手建起校舍. 可是, 校舍承載的歷史, 情感, 以及社區文化, 在政府的行政管治思維下, 輕易的被單一數字標準抹殺掉.

我們收集了幾個家長和孩子的故事. 我看沒有太多人願意把自己的辛酸告訴別人. 但這幾個家長實在受不了公眾和傳媒對梅窩人的無情指責, 以及政府對梅窩人的虧欠. 他/她們有話想跟大家說!

這是第一篇:

一個五年讀三校的嶼南學子的哀歌

外間人都話 , 人人都想出香港讀,邊有人想留低在南約?

我可以大大聲的對大家說 ,我最有資格否認!

我的大女2002年升中派位選校 ,大家一致決定選南約!一來親屬都是此校出品 , 雖然banding低 ,但勝在校風淳樸 ,老師好有heart......而且最最最緊要係夠近! 唔洗晨咁早趕船趕車,唔使去街食飯 ,慳錢慳時間,一家人齊齊整整食飯勝過果D天花龍鳳的親子活動!對於我地呢d草根家庭來講 ,選校首要條件係:

平、正、近 .

至於讀唔讀到書 ,好睇自己的.我對自己個女好有信心! 再講,佢表姐由幼稚園至中七都係梅窩讀書,都係南約出品.03年考入科大!南約每年都有幾個標青的考入U!邊個話南約係垃圾! 所以,我索性就在升中選校表上面淨係填左一個志願:

新界鄉議局南約區中學

(我地仲keep住果張選校表的底紙)

其他? 無呀 .

義無反顧 ,非君不嫁!

點知中一讀左一個學期(2004年1月),就有消息就話2年後就要執!真係晴天霹靂呀!

我個女無晒心機,雖然名列前茅,得好多學科獎,但係個感覺就好無助,好無安全感,好無心機......遲早要走,不如趁早,費事第日更加唔捨得.於是乎就去考玫瑰崗,得左,升讀中二.但係好辛苦,朝早搭 6點4快船番學,轉7點校巴~我都唔想俾個女搭四百幾五百蚊校巴咁奢侈! 無計,巴士去唔到學校,要行十幾分鐘大斜路先撐到上去,撐到上去都仲要係遅到喎 !

佢有幾個都係玫瑰崗的梅窩同學就索性5個人朝朝夾份搭的士番學!計起來,仲平過搭校巴!但係日日有的士咁好呀?番風落雨幾難截的士呀!

學校晨咁早7點7就上堂,2點9放學.校巴去到碼頭3點3左右.有3點2同埋3點10快船.個女知道屋企環境唔好,好識同父母慳,嫌快船貴(當時成人22蚊一程,11歲以上就係成人價!離晒譜! )竟然戇居居在碼頭等下一班4點半慢船 (10蚊!).番到屋企差唔多6點!又倦又餓......冬天時,仲要摸黑番學放學......

有人話 "大佬,香港地有車船津貼嫁! "係呀!個女一年的車船津貼足足有七千幾蚊! 好犀利!但只係交通費的一半!可想而知車船費幾貴,唉,都未計飯錢!

果陣時香港經濟差到死,好多人失業,尤其係建築業,小弟本身做三行,亞洲金融風暴前都算幾好境,養妻活兒唔成問題 .之後香港經濟大衰退,一家幾口勉強過得去,直到沙士之年,好多人跳樓.小弟上有高堂,下有三個仔女 .太太湊仔,又要照顧年邁多病成日要入醫院的翁姑,無做野;一個人做,幾個人食!唔留在梅窩讀點得呀?

好彩梅窩小學請左小弟做校工,人工七千.比三行少好多好多,但係有工做已經好好,而且學校的校長老師又nice,幾多人羨慕小弟搵到呢份筍工,成日問幾時唔做,記得單聲...... 唉,個女每月淨係交通費已去左1200,供樓又去4000幾......真係捉襟見肘!

個女係出面讀,成年都無參加過課外活動!一來要使錢,二來已經無咩時間用......唉,佢在梅窩出晒名活潑好動,課外活動的表現幾標青,田徑、足球、環山跑、消防大使......一屋獎杯!佢文又得喎,好鍾意睇書寫野,梅窩學校出過一本學生文集 ,小女都有三、四篇都見得吓人......但在玫瑰崗讀中二的成績表上 ,學科中上 ,全級200幾人,考60幾,粗粗地 ,都算係咁啦;但係課外活動呢?

得個 F !

好鬼諷刺 !

一個年年體育攞A的,課外活動獎擺滿房的人,竟然唔合格!中三果年,一向好硬淨的大女竟然喊住話要番南約讀! 佢話真係好辛苦,頂唔順......唉,人地小朋友係天生讀書人 ,無課外活動可能無咩大不了.但係,對一個咁活躍的細路來講 ,真係好唔人道! 但係,大家都知道南約已經無希望,只淨一年的期限......但係,睇到自己個女咁辛酸,真係好心痛!

唉,一年就一年啦!讀完中三再搵過! 話唔定,第日有人接手辦學呢!

個女番來後,成個人開心晒,簡直係如魚得水!老師又錫佢 ,同學又愛戴佢......

07年,升中四,不得不走.

學校已經盡力保住學校.但係教統局都係果句,07年之後, 會公開投標俾其團體辦學,耐心等下啦.....

卒之,區伯權校長寫推薦信去長洲官中,收左佢 .但係入唔到好搶手的文科班(FULL晒),焗住讀好唔在行的理科.細佢2年的細佬都係長洲讀.

細佬本應都會係入南約 ,但係04年教統局已經唔准南約收中一生,所以細佬果班同學仔就算有八、九個想讀南約都無得讀,焗住去第二度.....

雖然梅窩去長洲都係半個鐘多D船程,佢地又3點4就放學,都好早.但係要4點10先有船,番到屋企都差唔多6點.做功課做家務食飯沖涼又9點幾......好在第二朝只係搭8點船,好過好多學生,但係如果搭唔到呢班船,就要搭10點2,番到去11點囉!

大女初入去時,中英都係中上游,其他呢,下下游......佢已經好努力,但唔係理科料 ,事倍功半.理科成績始終追唔上,好灰心,開始自暴自棄......唉,我地又無閒錢無俾佢去補習!

第二年,勉強升到中五.老師見佢中文標青,本住愛才之心,俾佢優先轉文科(得三個位咋! ),但係就要重讀,佢已經意興欄柵!無接受老師的好意.佢淨係想快D離開學校,早早脫離教統局的魔爪!

中五會考,一塌糊塗,淨得中文科見得人......

唉,辜負左好多南約區中學、梅窩小學的師長的期望......

<完>

請繼續看大嶼山家長有話要說 -- 之二, 文中有關於8月30日梅窩社區行動的視像記錄.