體育

阿富汗政局影響球隊踢亞協?

廣告
阿富汗政局影響球隊踢亞協?

廣告

阿富汗超級聯賽揭幕戰踢完,奪冠熱門阿斯麥隼鳥以4-3險勝斯平加爾蒼鷹,呢兩隊波人腳同上季有差別,其中斯平加爾有7成球員係新加盟,今場被睇低一線,結果半場阿斯麥輕鬆領先3粒,以為只係一場強弱懸殊嘅比賽,點知一出返嚟斯平加爾就追返2粒,大家防線鬥鬆散下,最終再各自互入一粒。

今届冠軍同上届一樣可以代表阿富汗踢亞協盃外圍賽,不過由於安全問題,阿超聯只以分組賽單循環等形式進行,成個聯賽只係進行一個月多啲,似盃賽多過聯賽,到踢亞協盃之時阿超聯正處於休眠期,球員要放低工作再次重聚,比賽狀態肯定不足,加上冇主場可以用亦冇外援幫手,面對吉爾吉斯同塔吉克等有職業球隊嘅對手實在係好難踢,想喺亞協盃有好成積,必須要有一個有正規時間嘅聯賽,然後就係出錢請外援,呢樣除咗睇錢,仲要睇政局。

今場波兩隊好多失誤,但冇乜悶場,比大馬對香港嗰場好睇得多,兩隊入面有唔少球員技術同身型都唔錯,有啲入選過國家隊,不過現時國家隊主要以一班喺歐洲出世或移民已久嘅裔民球員支撐住,即使大部分踢低組別球隊,但整體水平比喺阿富汗土生嗰班球員要高,踢阿超聯嘅球員喺國家隊當中只佔少數,不過唔排除教練會改變政策,所以呢個幾月所有球員都會搏命,希望入選國家隊後可以畀外國職業球隊睇中。

廣告