廖老太
【獨媒報導】宏福苑去年發生五級火，獨立委員會今日完成最後陳詞，多名出席旁聽的居民在會後接受傳媒訪問。宏盛閣居民廖老太批評政府至今「零慰問」，並斥責部門不做好份內事，令居民要獨自「埋單」，並形容今次火災是世紀災難：「點解當局嘅人，咁耐無一個出嚟道歉，無一個承認事件嘅錯誤呢？認句錯係咪咁艱難呢？」
廖老太慨嘆「點解部門唔做多少少嘢」：「令到我哋街坊，咁多人一陣間就完全咩都無晒。」她指今次火災造成168人死亡，數千名居民流離失所：「點解無一句慰問呢？我哋仲要承受咁多外來嘅人，唔知道嘅對於我哋嘅傷害呢？一次又一次，傷口好返啲又插一刀。我同啲街坊年紀唔細，點解仲要承受呢啲嘢呢？政府點解唔可以勇敢啲做嘢？」
指未獲優先揀樓 一家五口只可揀300呎單位
廖老太質問政府「點解要咁樣對我哋宏福苑居民」：「唔可以好好俾我哋去揀樓，等我哋有返個安樂窩。」她不滿當局將「揀剩」的單位予宏福苑居民選擇，認為不但不是優先，更只得細單位可供揀選：「我哋唔係要求要好大嘅單位，起碼有返四百幾呎俾我哋，人哋一家五口、六口點住300幾呎？點解一定要逼我哋去揀嗰啲咁樣嘅豬頭骨呢？我哋冇辦法揀到㗎。」
她續稱假若今次未能揀選合適單位，便要等待同區的頌雅路西居屋單位落成：「等幾年呀，如果好似我咁嘅年紀，我唔知我等唔等到㗎。」廖老太又指，現時入住的過渡性房屋僅得150呎，並且缺乏私人空間：「啲官員衣帽間都唔止150呎啦，但我哋要屈3個人喺度住。點解要逼我哋第日揀咗樓，都係要住二百幾呎咩？我唔知佢哋仲有無良心。」
聽證會解答部份疑問 惟未釐清誰應負責
已在宏福苑居住43年的廖老太，其單位在大火中未有受災。她仍然牽掛單位的物品，「一張紙都係我哋嘅寶嚟」，認為三小時執拾時間嚴重不足。她又隔空反駁宏新閣譚先生的「生活唔擔憂」論，指並非對方所說的「收咗好多錢」，指相關援助並非用作揮霍，而是用作日後新單位入伙後置屋及生活：「希望當權嘅人有啲良心，可以俾我哋宏福苑嘅人再上去。」她希望當局安排第三次上樓，而且不限時數、人數入內執拾。
被問到30日的聽證會是否已解答其心中疑問，廖老太稱自己未有出席所有聽證會，但稱部份疑問的確已經解答，但卻未有釐清誰應負上責任，認為政府監管機構、承建商及議員都有責任：「佢哋盡返少少嘅責任，我哋宏福苑嘅災民就唔會有咁樣嘅田地。」她一度哽咽落淚說，「我哋唔會流離失所，唔會咁多人冇晒親人。」
資料圖片
稱假若不再安排上樓 將不簽買賣合約
在火災當日，廖老太現場目擊每幢大廈起火，形容十分崩潰，今早聽證會的總結便令其想起當日的景象。她提到火災當日，有街坊拍門喚落樓，遂與丈夫及孫兒落樓：「落樓嗰一刻，我仲會希望話我一陣間就會返上去。當時個孫發燒嘅藥都冇攞到，我自己心諗我一陣間就返上去俾藥佢食，但點知出咗嚟嗰一刻就冇再返上去。」
在受訪期間，廖老太再次哽咽稱，曾希望在解封後可以上樓，因為單位沒有受災，豈料再次上樓已是數月後，希望假以時日能夠與孫兒重回單位：「佢唔俾我返屋企，唔會簽任何嘅買賣合約。我唔可能咁快放棄晒我屋企嘅嘢，有冇用都係我知道，你俾我返去執埋晒，我咪甘心簽囉。」
批合安做騷 業主大會沒答問環節欠互動
談到周日舉行的業主大會，廖老太便怒火中燒，批評合安只是「做騷」應酬街坊，而且必定欠缺互動，更因為沒有答問環節：「冇得對話，呢個係咩業主大會呀？有佢哋講冇我哋。」
她最後表示，一眾宏福苑街坊一直即使感同身受，但至今仍不懂得如何安慰失去親人的街坊：「點解咁多人要去承受政府同咁多機構嘅過失？幾十歲嘅街坊仲要承受呢啲嘢。」
廖先生
居民指官員至今未道歉 令人無法釋懷
廖老太的兒子廖先生則稱火災發生至今，心情仍未平復，對失去居住多年的家園感到心酸。他受訪期間更一度哽咽：「始終發生咗咁耐、咁多事、係辛苦嘅，但亦都想涉事方盡快得到判決，承擔返自己應有責任，向宏福苑居民交代。」
此外，廖先生同稱，政府至今仍未在公開場合道歉或向宏福苑居民慰問，令其無法釋懷：「有人道歉，可能會放低返一部份，起碼原來政府係關心市民，不論是宏福苑居民又好啦，市民大眾都好，原來政府係發生重大災難後，有出來慰問吓市民，我相信會幫一部份居民有釋懷嘅感覺。」他特別點名批評房屋局獨立審查組（ICU），指他們作為審批部門，應首當其衝向居民交代及道歉。
然而，廖先生對政府作為監察一方，是否會承擔責任及問責的信心就不大，慨嘆當局或繼續推卸責任，期望「問責制嘅官員，做返問責制呢樣嘢」。
有居民要求政府追究黃碧嬌責任
連日出席聽證會、曾擔任證人作供的宏昌閣居民李先生，他接受訪問時稱對整個聽證會不太滿意，批評政府及其他代表律師「一味喺度交波」，「都唔係講事實出嚟嘅，一味喺度橫傳」。他認為只有代表委員會的資深大律師杜淦堃「最中肯」，能將所有問題提出，但未仍未釋除其部份疑問。
被問到聽證會是否能為火災找到真相，李先生認為要視乎陸啟康如何處理，並希望政府正式向涉事人士追究責任，「依家168個人命咁樣走晒，你冇理由話一啲責任都冇㗎嘛」。
對於有涉事證人未有現身作供，李生則稱「梗係唔公平啦」，指行政長官給予權限成立調查委員會，理應運用權力要求涉案人士出席。他又提及黃碧嬌收取授權票一事，促請當局追究黃碧嬌及前法團主席鄧國權的責任。
宏福苑火災獨立委員會 聽證會｜第三十日
杜淦堃：宏福居民真金白銀買專業 換來徹底辜負
居民稱聽證會仍未找出真相、政府仍未道歉
住戶批政府至今零慰問 斥部門不做好份內事致居民埋單
宏福苑火災獨立委員會 聽證會｜第二十九日
政府澄清非大火始作俑者 承建商及專業人士須負「首要責任」
居民點名多個部門失責 指「多重監管失靈」釀禍
政府總結屢提被騙 居民：家園無燒惟自比受害者
藍白易燃帆布管不管？陸啟康驚覺府上亦有「原來好危險」
警方接線生「耍走」求助 婆婆終命喪屋內 政府稱個別行為不代表系統失敗
吳躍疑收15萬「獎金」做橡皮圖章 政府斥無監督任何火警風險
政府提五「系統性弱點」 承認抽樣難發現串通隱瞞