【獨媒報導】宏新閣居民連續第二日上樓執拾，Dorz 與88歲祖母在火災前同住在中層單位，嫲嫲在上周入院不適未能一同上樓。孫仔最後上樓替嫲嫲拾回手抄經文筆記、爺爺生前的中醫牌匾及馬拉松的獎牌。Dorz 接受《獨媒》訪問時坦言，過程並不好受，形容心情遊走憤怒與悲傷之間，期間不斷反覆思考：「點解發生啲咁嘅悲劇，即係大家好地地小康之家，但點解會發生一件咁悲慘嘅事，我哋1,900幾戶去無端端要食呢樣咁無情嘅嘢？」他亦對政府做法感到憤怒：「當權者係咪真係要咁處理呢樣嘢，用呢個方法處理就覺得好恰當？」
宏新閣中層居民連續第二日上樓執拾，Dorz 在執拾後接受《獨媒》訪問，坦言過程並不好受，在看到屋企被燒毀一刻「好有窒息感」：「真係好似要面對呢件事，喺之前做咁多心理準備都無乜用。」
Dorz 早上9時上樓執拾，在中午近12時執拾完畢，其身穿的淺啡色上衣沾上黑色污跡。他在踏出宏新閣後先與親友將四袋家當，存放宣道會廣福堂，便急急到廣福街市的仁濟幸福站租用迷你倉。
圖片由Dorz提供
圖片由Dorz提供
採「循道漸進」方式執拾 嫲嫲觀看直播「幫手」
面對只有3小時，Dorz 採取「循道漸進」的方式收拾物品，他先從客廳及自己房間開始，最後才「打大佬」執拾最多物品的嫲嫲房間。他表示，由於自己房間靠窗位置被燻黑燒毁，嫲嫲房間則完好無缺。至於受災最嚴重的是廚房及客廳，客廳的窗口更已完全燒爛，並圍封橙帶，不少物件倒塌在地上，難以短時間找回想要的物件，Dorz 不諱言能拾回東西已很感恩。
在自己的房間中，Dorz 則執拾了跑步獎牌、擺放機票票尾的護照套及一雙球鞋。在火災前，Dorz家中有兩個鞋櫃，「我最鍾意啲鞋都燒晒」，他最後只取走較新淨的波鞋。他指最有紀念價值的是，第一次跑渣打香港馬拉松獲得的獎牌，並向記者展示與妹妹小時候，及嫲嫲不同時期的相片。
取回祖父生前中醫牌匾 思考「點解發生啲咁嘅悲劇」
Dorz 的祖父生前是中醫師，家中便有爺爺留下來的兩塊牌匾，由於體力限制，只能取走較細的一塊。Dorz 嫲嫲身體不適未能上樓，只能透過FaceTime 「幫手」執拾物品，包括相片、手抄經文筆記、爺爺的牌匾、柔力球套裝。親友表示，當嫲嫲一打開尼龍袋便非常開心滿意。
圖片由Dorz提供
然而，Dorz在上樓期間感覺不好受，每行一層樓梯看到的燒毀情況，「入面又好，樓梯又好，你都會見到一片頹垣敗瓦，心都唔好受」，當踏入自己屋企望見廚房被燒毁一刻，更是「好有窒息感」：「真係好似要面對呢件事，喺之前做咁多心理準備都無乜用。」
Dorz 形容上樓及執拾的心情，遊走憤怒與悲傷之間，並且不斷反覆思考：「點解發生啲咁嘅悲劇，即係大家好地地小康之家，但點解會發生一件咁悲慘嘅事，我哋1,900幾戶去無端端要食呢樣咁無情嘅嘢？」他亦對政府做法感到憤怒：「當權者係咪真係要咁處理呢樣嘢，用呢個方法處理就覺得好恰當？」
攝錄機掛心口 遭以樓梯為公眾地方要求收起
在上樓前，Dorz 已將攝錄機掛在心口，惟遭以樓梯為公眾地方要求收起。他反駁指行樓梯不會影到其他單位：「我唔係影其他人，淨係影下面，都可以俾人叫收埋個cam。即係我有啲不解嘅係⋯⋯覺得做乜要影相都唔得，要你收埋cam，我會覺得做咩嘢要好似要冚過晒一切咁。」
Dorz 最終未有用盡三小時，在11時許已感到非常侷促頭暈，在收拾主要物品後，便以默哀方式向屋企道別，並再回頭看一看，走最後一轉，好讓情緒「放空」，再與朋友說「走啦，唔好留喺度啦」便離開。他坦言，「再留喺度會驚自己愈諗愈多，同埋都唔係好頂得順」。
懷不捨心情告別 最後一刻尋回中小學成績表
Dorz 以非常不捨的心情，告別從小居住到大的家，「最後執嘅嘢同我離開單位有啲共鳴，自己個吓都忍唔到住流眼淚」。他又向分享，最後一刻找到自己的小學相片及中小學成績表：「原來搵出嚟個時，阿嫲寫明呢個係小學同中學嘅嘢，擺係廳一個位，執完啲嘢之後話唔執啦，望住間屋咁樣呆咗一陣。」
另外，Dorz 又提到嫲嫲其中一個櫃上了鎖，必須留待她上樓開鎖。他希望政府能夠再次安排上樓，一圓嫲嫲回家的夢，「就好似我咁有個釋放，我啱啱上完去都自己嗰下釋放，都覺得即係件事終於完，我諗佢好想，就係差呢一下」。他指雖然暫時「一刻放鬆」，但仍要為安置及調查進展煩惱。
嫲嫲仍盼上樓回家 「自己用眼去睇」
88歲嫲嫲一直在宏新閣樓下觀看直播，記者提到孫仔執拾了筆記時，她笑得「見牙唔見眼」：「係啊，好重要，因為俾心機寫埋筆記囉，全部未有燒到，好感恩。」她對重拾家人及丈夫的相片感到開心：「好叻！我好開心呀，早啲可以上去睇到個間屋，攞啲我好鍾意嘅嘢返嚟」。
在孫仔口中「好堅強」的嫲嫲，她透過電話「回家」，第一眼看到屋企損毁不算嚴重，笑言心情不錯：「都唔係好嚴重，仲有一啲嘢係度嘛。其他地方燒咗，廚房燒得好緊要，我覺得，燒咗都燒咗囉。」
孫仔找回筆記 獲嫲嫲大讚「叻仔」
嫲嫲早前因感染肺炎住院兩周，出院後雙腳已無力行上樓梯，她坦言「我今朝早都想試下」，孫仔聞言即稱「唔好呀，好焗呀，真係好焗」，她便說「後尾我覺得，都係上唔到」。雖然今次未能親身回家，嫲嫲期望再有上樓機會：「對呢間屋仲有感情，住咗好耐喇，自己用眼去睇睇囉。」
對於重獲珍貴物品，嫲嫲就大讚孫仔「好叻」，並期望有機會上樓。若然再有機會上樓，嫲嫲稱會準備力氣「爬上樓」，最重要是膝頭有力支撐：「我想如果仲有嘢未燒咗，我仲想攞埋，因為鋼琴上面有好多詩歌譜，我想攞埋。」在旁的Dorz 不禁說：「我見到，我唔敢攞。」