【獨媒報導】本週二（21日）有宏新閣居民上樓時，曾向傳媒表示發現煙頭；率先起火的宏昌閣昨天（23日）開放上樓，再有居民發現煙頭。宏昌閣住戶周先生向《獨媒》表示，在客廳發現2至3個煙頭，懷疑災後有加固工人進入單位食煙，周先生指感到憤怒：「我間屋未被政府收購，業權仲係我哋㗎嘛，你哋入去加固還加固，你哋食完袋返走。你哋丟低煙頭，喺間屋屙屎屙尿都得啦，對我哋唔係好尊重。」
此外，周先生原希望拍攝3樓升降機旁的水牌留念，又想拍攝沿著車路進入宏昌閣的一段路，都被警員制止，指單位外公眾地方不能拍照。他慨嘆：「屋企人兄弟姐妹，都想影吓平時我哋屋苑，由細住到大，點解去到今時今日會變成咁，都想影返啲相。」
宏昌閣3樓單位（圖片由周先生提供）
疑災後加固工人食煙
周先生在宏福苑長大，自己和太太住在宏昌閣3樓，另有家人住在2樓，昨天分上下晝返回兩個單位。周先生表示昨天上樓時，在3樓單位客廳發現2至3個發黃煙頭，家裡本身無人食煙。他認為是大火後，工人進入單位工作留下，直言感到憤怒：「我間屋未被政府收購，業權仲係我哋㗎嘛，你哋入去加固還加固，你哋食完袋返走。你哋丟低煙頭，喺間屋屙屎屙尿都得啦，對我哋唔係好尊重。間屋爛成咁，唔代表你可以周地掉煙頭。」
宏福苑最初起火原因懷疑為工人吸煙，周先生表示「憤怒唔係好大」，認為關鍵是政府部門不知消防系統關閉，「依家講嚟講去都係成個消防系統冇咗，先咁大火，啲人逃生唔到」。「你哋啲部門一個推一個，一個推一個，個個都話唔關佢哋事，咁關邊個事？」他憶述居民曾多番舉報投訴大維修，新聞也有報導：「冇人理，係咪政府部門失責呢？」
圖片由周先生提供
挖掘龍鳳鈪、勞力士手錶 「叫卓局長試下要幾耐？」
周先生表示3樓單位有做加固，在單位內找回變形的龍鳳鈪和一隻勞力士手錶，「掘咗好耐」，挖掘找尋有價值物品，已耗時近3小時，過程相當困難：「啲嘢唔係一陣灰，燒到有啲嘢一嚿嚿，有啲要搬走，有啲地方灰燼燒到硬晒要鑿碎佢，先掘到個底。」他指同時要小心翼翼，擔心挖掘破壞底層的珍貴物件，提議「叫卓局長去挖一個單位，試下要幾多時間？」
圖片由周先生提供
警員帶路感壓力 單位外禁拍照
周先生也表示，在單位外被防暴裝束的警員制止拍照，表示政府訂下條例，除單位內，其餘公眾地方都不能拍照。他原希望拍攝3樓升降機旁的水牌留念，又想拍攝沿著車路進入宏昌閣的一段路，「屋企人兄弟姐妹，都想影吓平時我哋屋苑，由細住到大，點解去到今時今日會變成咁，都想影返啲相，去諗一件事，或者想回憶下，我相信好多人都會咁做，連咁樣都話唔比我哋影。」他認為公眾範圍太大，「公眾咁大個範圍，人哋住廣福邨，搵支長鏡點影都影到啦。」