政府自 2021 年起進行《交通運輸策略性研究》。2023 年尾公佈嘅初步策略建議中，政府已經透露有意在單車主幹道設置「單車友善過路處」，毋需使用者下車，改善單車使用體驗。有見及此，我哋幫政府諗到三個適合試行相關改動嘅位置。以下係我哋嘅改善構思：
位置一：上水新運路及智昌路交界（繁忙交通燈路口）
新運路係上水嘅主路，人車交通流量頻繁。路口位置以交通燈控制，現時單車徑於過路處前終止，並有藍色的下車步行指令標誌。三個分岔口都有行人單車橫越，而過路處均為直行式設計，毋須過路者喺安全島等候。正如上篇文章提及，呢個路口具備近乎所有成為「單車友善路口」嘅硬件。只要劃出正式位置、將行人單車分隔開，單車使用者就能名正言順、安全騎車過路。
我哋建議取消下車步行指令標誌，並將部分行人過路處範圍改為單車過路處。範圍以新道路標記標示，容許騎單車橫越馬路。可設置單車專用交通燈，或者仿效北美做法，設立「騎單車者使用行人過路交通燈」標誌。為保安全，安全島深度應確保不少於兩米，讓單車使用者有需要時安全停留等候。
位置二：將軍澳寶豐路及毓雅里交界（一般非燈控路口）
呢個路口位於寶琳次要幹路（寶豐路）與內街（毓雅里）交界。路口無交通燈控制，設有行人輔助線。單車徑名義上在過路處前終止，但罕有地無設下車步行指令標誌，而部分安全島範圍仍塗上與單車徑相同嘅路面顏色。單車與行人均須讓路予馬路上的車輛，但欠缺有關指示。
有一特別之處：從地圖可見，現時單車徑走線呈「W」形狀，曲折路型鼓勵單車使用者收慢速度，亦為進出內街車輛提供「退後距離」（Setback）、容許車輛停頓；人車相遇時呈直角，讓雙方更容易看見彼此，減少碰撞風險。
我哋建議將部分行人過路處範圍改為單車過路處。範圍以新道路標記標示，容許騎單車橫越馬路。維持現有優先權分配，在單車徑明確設置「讓路」地面標記，指示騎單車者需讓路予來車。
位置三：大埔船灣大美督路（內街路口）
路口位於大美督公共運輸交匯處旁，通往淡水湖水壩，沿途有幾個青年旅舍同康樂設施。路口無交通燈控制，設有行人輔助線。現時單車徑於過路處前終止，並有藍色的下車步行指令標誌。呢度假日遊人眾多，單車流量頻繁但車流量低，適合引入更進取嘅新型設計，讓單車同行人均有優先權。
我哋建議取消下車步行指令標誌，並引入新嘅單車過路處道路標記，指定可騎單車過路範圍。但如何賦予單車同行人優先權，則細分為兩個選項：選項 A 主張在車路加設「讓路」地面標記，指示駕駛者讓路予單車及行人；而選項 B 則為引入「行人及單車均優先」嘅新型班馬線（英國稱之為 Parallel Crossing）、配備卑利沙燈。兩個選項嘅目標都係相同，就係令駕駛者需要均對行人同騎單車者讓路。
單車過路非洪水猛獸 安全設計體現雙贏
單車過路喺國內外已經被廣泛接受，並設立清晰標準規範。政府應逐步革新單車徑路口同過路處設計，喺合適位置取消強制落車規定，並透過設置讓線、班馬線或單車專用燈號，讓單車使用者能夠顯眼、安全和直接地過路。
設計可配以顏色路面標記、減速平台和收窄轉角半徑等交通緩行設計（Traffic calming），進一步導引良好行為。當然使用者嘅安全意識都好重要，當局需更新教育方式，更有效地向騎單車者同司機灌輸交通規則認知、禮儀及態度。將單車過路合法化，踩單車先能夠真正變得舒適便利。香港係時候追上時代。
大家又有咩睇法？關於位置三，你又鐘意邊個選項？不妨留言話我哋知。
——————————————
按：政府發表《運輸策略藍圖》在即，訂下未來二十年嘅運輸政策方針。街道變革今周一連數篇，帶大家走進過往人本運輸政策沿革、剖釋現時痛點，並重溫我哋兩年前發表《未來交通運輸策略立場書》嘅主要建議，探討未來可能。
（本網歡迎各界投稿，文章內容為作者個人意見，並不代表本網立場。）