前排我哋去荷蘭考察，親身感受到一個真正單車友善嘅城市係點樣運作。唔單止單車徑網絡完善、過路位安全又順暢，去到目的地完全無需要擔心點泊車。因為市中心同商場都有附設嘅室內泊位設施；喺大街仲會有顯示屏，即時更新各停車場仲有幾多單車位剩。車站又有單車轉乘配套同租賃服務，提供首尾程駁腳。商業大廈仲會附設沖涼房更衣室，滿足埋你驚「返到去成身臭，點開會」嘅切身需要。呢種無縫舒暢嘅單車體驗，令人不禁反思香港嘅單車政策仲有幾遠要追。
荷蘭嘅成功，歸功於佢哋以「使用者體驗」(User Experience) 角度去設計每個環節，務求減少阻礙，令踩單車成為日常生活中自然、方便又舒適嘅選擇。結果，城市環境同配套令市民好自然想踩單車，因為呢個係最直接、方便同舒服嘅出行方式。政府亦唔係起完條徑就算，仲會主動收集數據去檢討同升級設施，配合單車流量發展同安全需要。城市為咗單車而改造，環境亦因為車少咗而變得更好。汽車唔再係城市嘅主體，主體變成以人為本。
單車網絡嘅質素，取決於其最弱嘅環節。就算條徑做得幾闊幾靚，如果一去到路口就打回原形，咁就前功盡廢。其實香港單車路段嘅質素係起得愈來愈靚，可惜路口過路位永遠斷開、泊位總係遠離實際目的地，因為底層邏輯係「踩單車始終都康樂野、唔順暢都無所謂」。單車規劃要做得好，呢套心態就要改。唔止偶然一個好官改，仲係成個運輸官僚系統同顧問行業嘅思維要改。
單車使用體驗安全相輔相成 優質網絡須符六大原則
想締造優質嘅單車網絡，就要意識到使用者體驗同安全係相輔相成。好嘅設計唔止為咗對單車友善，仲會令使用者更加願意守規矩。所以即使著重安全，都要顧及其他影響行程體驗嘅因素。以下六項（詳見圖四），就係單車網絡需要符合嘅「核心原則」(core principles)：
- 連貫 (Coherent)：單車網絡要做到路徑連貫，使用者可輕鬆踩到日常目的地。路徑質素要保持一致同容易導航。
- 直接 (Direct)：單車路徑唔應該兜遠路，應該同私家車路線一樣快捷，甚至更快。
- 安全 (Safe)：唔單止局限於單車徑，仲要涵蓋周邊道路同整體街道系統。即使無單車徑嘅鄰近路段，都要有足夠嘅單車友善設計（如低車速同低車流）去保障安全。
- 舒適 (Comfortable)：單車應該被視為車輛而唔係行人，唔應該要求使用者落車或頻繁停車。路徑要平滑保養得好、避免陡峭坡度，寬度要足夠應付單車流量。
- 具吸引力 (Attractive)：單車基建整體環境同形象，對市民使用單車出行意欲有密切關聯。應使用高質素設計同物料，營造優美同舒適嘅公共空間網絡。
- 共融 (Inclusive)：唔同年齡同能力嘅人都能夠安全舒適咁使用單車網絡，兼顧唔同用途嘅需要。
上面每個元素互相影響，所以缺一不可同樣重要。安全唔等於一定要犧牲單車出行嘅舒適度同順暢度，而應該先考慮以改變街道優先權、空間分配和車速限制去達致安全目的。
整全單車政策用家為本 專責架構落實改革
要實踐願景，單車網絡應靈活運用不同類型通道擴展（單車徑、低速內街、建築物旁緊急
車輛通道等）；新發展項目亦要加入泊位同更衣淋浴間等配套。將單車融入公共交通政策，喺車站提供室內泊位同轉乘租賃配套。街道泊位亦應採用「多處少量提供」模式，令使用者可就近最終目的地位置停泊。同時要接受單車同汽車需在某啲地方共用道路嘅現實，因此要提升道路同大車設計安全性。
目前香港單車規劃權責零散，各工務部門同地區辦事處嘅做法各異，亦無清晰同與時並進嘅規範。歸根究底，我哋需要高級別嘅政策支持，由一個位於政策局層面嘅統籌機構，先有牙力推單車政策上軌道。兩年前我哋嘅《未來交通運輸策略立場書》中，已經建議政府參考海濱發展政策，喺運輸及物流局下設立「活躍出行統籌辦事處」，由新設嘅「步行及單車策劃專員」領導，負責制定單車政策、策略規劃同技術標準，並整合現有人手資源、向議會同社會爭取支持，協調各持份者改善同發展單車基建。
香港從來唔缺技術，基建複雜程度係世界前列。只要思維改變，以使用者體驗為核心，我哋都一樣可以成為真正嘅單車友善城市。但願政府即將公佈嘅《運輸策略藍圖》能夠訂定政策方向，從零散嘅基建思維轉向綜合網絡規劃。只要跨部門協作、投入充足資源同釐定清晰進取嘅標準，我哋就能夠為未來新區同現有市鎮建立優質嘅單車網絡，令踩單車成為我哋日常生活中自然又便捷嘅出行方式。
—
《運輸策略藍圖》前瞻系列完
文 / 嚴卓衡
設計圖 / Benny、Arthur
（本網歡迎各界投稿，文章內容為作者個人意見，並不代表本網立場。）