政府發表《運輸策略藍圖》在即，訂下未來二十年嘅運輸政策方針。街道變革未來兩周將一連數篇，帶大家走進過往人本運輸政策沿革、剖釋現時痛點，並重溫我哋兩年前發表《未來交通運輸策略立場書》嘅主要建議，探討未來可能。
二千年代，港府曾經大規模推動行人環境改善計劃。銅鑼灣、尖沙咀、佐敦、深水埗等 12 區嘅核心區域，都經歷過一系列嘅改善措施。除咗為人熟知嘅行人專用區（如旺角西洋菜街、羅素街、白沙道等），亦有推行名為「悠閒式街道」 (traffic calmed streets) 改造措施，例如擴闊行人路、行車線同路口收窄、設置減速平台同減少停車位等，以減低車速同交通流量。
當年願景規模大，項目推行速度快。高級官員親自開記者會講解計劃，可見當局對計劃嘅重視。1999 年當局委託顧問研究，從被環保署定為空氣污染黑點地區嘅街道入手，設法減低交通流量。2000 年初選定銅鑼灣、旺角和尖沙咀優先推行。2002 年末已經有 5 條街被列為全日行人專用區、22 條變成部分時間行人專用，另外有 22 條街經過改造加入交通緩行設計。速度之快，不能同日而語。德輔道中行人專用區 (WalkDVRC) 嘅概念，亦都係當時由規劃師學會提出。
願景驅動 環境與運輸融合嘅黃金時代
點解行人政策當年可以推行得咁快呢？改善現有街道嘅行人環境，喺 1999 年施政報告同《長遠運輸策略》不乏篇幅；另外嘅一手資料亦顯示計劃受當時運輸署長霍文高度重視。運輸署 1999 年隸屬運輸局，2002 年問責制推行後則歸入環境運輸及工務局。相關嘅常任秘書長係同時負責環境同運輸；當年文件顯示運輸範疇四大施政方針，三項都係同改善環境有關：促進有效率同環保嘅運輸模式、減少行車量同改善行人設施。運輸政策同環境擺埋一齊，政策思維同優先次序自然較受願景主導。
當年運輸署同規劃署喺推進行人政策嘅合作都幾緊密。例如 2001 年開始嘅《行人環境規劃研究》係交由規劃署統籌，制訂步行環境嘅設計標準和指引，成果被運輸署採納成為《運輸策劃及設計手冊》嘅一部分。銅鑼灣行人專用區及環境改善計劃，亦係由規劃署主導可行性研究同公眾諮詢。2004 年針對尖沙咀區嘅項目，則上升至「地區改善計劃」嘅層面。兩署共同委託顧問推動項目，從行人環境、景觀、街景同城市設計方面推動綜合改善。可見當年當局係以城市設計思維主導街道運輸方針。
但後來又點呢？2007 年政策局改組，運輸署改為隸屬運輸及房屋局；特首曾蔭權提出十大基建，政策同資源重心轉向新基建同推動房屋發展。自此，運輸署改善行人環境嘅速度放慢，新研究亦集中於改善九龍東商貿區，並由發展局同土拓署主導。後來旺角行人專用區因缺乏管理導致長期噪音擾民而取消；行人措施基建先行，重心變成建設行人天橋網絡同上坡電梯；改善現有街道環境不再備受重視，亦都解釋點解 WalkDVRC 對政府嘅游說漸漸無以為繼。
紙上藍圖 行人框架有心無力
行人政策一直要等到 2017 年施政報告先有進展。特首林鄭月娥推動「香港好易行」政策，委託顧問推展《提升香港易行度研究》，又喺運輸署設立固定編制「步行城市策劃組」專責推行項目。不過研究搞咗五年，實際進展又點？研究將中環同深水埗定為試點，試驗移除非必要交通標誌同欄杆、引入新行人導向標示系統同適用於巴士路線嘅減速平台等措施。研究有訂埋喺兩區內全面推行街道改善嘅建議方案，但政府無下一步嘅撥款推行項目，至今無大規模改變落到地。
唯獨有兩個較實質嘅改變：1) 兩個街區同另外十幾條街已實施 30 公里低速限制，同 2) 訂立咗新嘅《行人規劃框架》。新框架引入「行人環境大綱圖」(Outline Pedestrian Plan; OPP) 的制訂程序，並提出「城市網格」嘅指導概念，喺「內網格」（被主要幹道包圍的街道）給予行人較高優先權。行人路嘅最低闊度，亦需因應行人路作為「通道」同「場所」(Link and Place) 兩種功能嘅相對優次而定。OPP 程序亦訂明需要為街區進行城市設計分析，吸納工程角度以外嘅專業意見。框架喺 2022 年末加入《運輸策劃及設計手冊》，不過暫時未見到署方有喺現有街道推行 OPP 嘅計劃，所以影響目前只涵蓋新發展區。
破局前行 改革城市設計嘅政治決心
新發展區嘅街道規劃有改變梗係好，但舊區都唔應該忽略。運輸署作為執行部門，本身並無政策授權 (mandate)、亦無額外項目嘅人手資源。要做到野，就自然有得有失、有人（如車主）唔高興。如果政策局唔積極推動政策落實、無主動游說議會同社會給予新資源，執行部門就自然無人肯承擔風險做新嘢。
一紙文書本身無用。政策要有齊清晰嘅行動承諾 (commitment)、充足資源同執行指標，事情先會上行下效。寄望新嘅《運輸策略藍圖》能夠重拾當年嘅大刀闊斧，以城市設計視角、策略性改善現有街道環境。勇於改革街道嘅路面空間分配，先係真正嘅易行城市。
註：由於篇幅有限，上述沿革或過度簡化。如果資料有誤或了解更多內情，歡迎指正或補充。
（《運輸策略藍圖》前瞻：行人篇（三之一）
附圖：時序圖 (五張)
（本網歡迎各界投稿，文章內容為作者個人意見，並不代表本網立場。）