先把雞放在沸騰的熱湯浸1小時，再入味50分鐘。一隻海南雞總共要花2小時才完成，再配以南薑煮調，去除腥味。
《食神》有話，煮食之道，一字記之曰：心！
位於頌安街市的君苑海南雞專門店，作為一間小店，能夠日賣70隻雞，並不簡單。用心、堅持食物質素，就是他們的秘訣。
雄心
君苑的主理人張先生和陳小姐，在馬鞍山住了逾20年，是正宗地頭蟲。兩人「男主內、女主外」，張生每日在細小的廚房專心烹調鎮店之寶海南雞，陳小姐就負責舖面，由落單、與客人打牙骹、跟師傅傾裝修，甚至招呼《馬聞》記者，都由她一手包辦。
二人由馬鞍山的街坊變小店老闆，都是機緣巧合。他們以前都從事飲食業，兩年前張生辭職，陳小姐經友人介紹，決定創業開餐廳，「租金唔太貴，睇過覺得人流OK，咁多小學、中學。淨係頌安、錦豐都有8,000戶，同埋兩年幾前馬鞍山做泰式食物都少。」
第一代的君苑由細做起，只承租了接近外街的舖位，舖面只有現時一半，客人不能經街市入店，每逢打風落雨，出入甚為不便。當時相鄰、接近街市的舖位長期烏燈黑火，一年之內三度易手，陳小姐便索性把舖位也租下來，打通兩舖，成為現時「君苑2.0」的舖面，客人可循街市進入，方便不少。
信心
君苑以海南雞作為鎮店之寶，原因是張生和陳小姐都愛吃西灣河太安樓的海南雞飯，「佢係好食，不過可以更好食」。張生憑40年入廚經驗，自信做得出更勝太安樓的海南雞。
君苑原本有泰國藉國大廚坐陣，惜年中因工傷離職，由張生頂上，陳小姐說：「師傅都將廚藝收收埋埋，加埋我老公之前喺酒店做總廚，功夫無學到十成都有八、九成，街坊都好接受。」《食神》話，煮食要用心，查實信心都好重要。張生和陳小姐本着「無信心就唔會做好，兩個都有信心只會愈做愈好」的精神，不斷改良海南雞飯，一個負責整，一個負責試，做出自家味道。
海南雞飯易學難精，君苑的黃飯用斑蘭葉、香芧、姜黃粉、椰奶製成，特別在棄雞油而用雞湯，飯粒比傳統做法乾身，不會太油膩，但仍保持粒粒金黃。
至於海南雞飯的主角，君苑堅持使用新鮮雞，雞隻在深圳屠宰後6小時內送達頌安，每天早上和下午各來兩轉。為保持雞味，張生用浸雞的方式烹調，取代煮和蒸，做出來更有雞味，肉質滑口而不霉。君苑的海南雞高峰期日賣70隻，如果假期客人多，更會售罊。
君苑另一道招牌菜是「客家碌鵝」。碌鵝在香港本身已經很少見，這道客家菜更竟然出現在一間主打泰國菜的餐廳，原來是因為君苑開業後，發現頌安邨有不少街坊與張生一樣是客家人，他們便決定以家鄉菜回饋大家。
碌鵝少見於一般食肆的餐牌，因為這是一道製作需時的功夫菜。陳小姐指，一隻鵝重9至11斤，清潔內臟後塞滿材料，放在45斤重的大鑊內碌20分鐘，把整隻鵝碌至金黄色，之後焗一個半小時，再攤凍3小時，讓鵝肉自行吸收水份，保持鬆軟的口感。等待鵝肉收水的時間「冇價講」，不能攤少一會，盡快斬件上碟，否則鵝肉會立即收縮，流失彈性和肉汁。單聽步驟，就知道炮製碌鵝的手工和經驗缺一不可。工序繁複，加上君苑人手有限，這道招牌菜每日限量供應，售完即止。
小店生存之道，在於翻枱速度快，做得一枱得一枱，「慢工出細貨」的大廚態度與小店的快靚正宗旨，明顯是火星撞地球，亦令管樓面的陳小姐和掌廚的張生時不時在君苑上映大龍鳳，「梗係日日都鬧交咁滯啦，好似啲鵝咁，有時外賣賣咗5份，堂食想要多兩份都無㗎啦。咁我就會好炆，你明知嗰日係假期就整多啲啦！」海南雞都是賣完即止，陳小姐記得，曾試過一晚之內因海南雞售罄而走了八枱客，肉痛非常。「我哋做樓面咩都係講盤數，佢哋師傅就唔係，唔理你幾多生意，總之就要做到客人話好食先得。」
用心
急驚風遇著慢郎中，陳小姐與張生不時在餐廳六國大封相，和事佬的重任就落在街坊身上。君苑開業兩年，已累積了不少情如朋友的食客，而這些「好客」，亦是街市獨有，「商場客志在食飯，食完就走，凡事點到即止；街坊朝見口晚見面，好似屋企人咁，咩都講。」
開餐廳賺到人情味，但都難掩辛苦。張生樂在廚房把雞和鵝煮得盡善盡美，樓面的陳小姐就頂住經營壓力，與供應商議價商貨源，哪怕只是加價一元，都要深思熟慮一番。遇上大時大節，員工都想放假與家人過節，陳小姐和張生就要「直踩」，農曆年假期試過日做17小時，已分不清君苑是舖還是家。
君苑堅持品質，海南雞一定要用新鮮雞，禽流感來襲要殺雞，寧願停售雞飯，以免做壞招牌。陳小姐指，雞的來貨價幾乎只加不減，租金壓力大，領展兩年要加一次租，但又不能把成本全數轉嫁消費者，唯有用心做好本份吸食客，「都無計，始終投資咗咁多，一係做，一係唔做。唯有努力啲囉，搵多啲客，做好生意。」
大家不時諷刺馬鞍山是美食沙漠，當一家連鎖食店進駐，居民就在社交網站奔走相告。其實與此同時，馬鞍山仍有願意為食物品質花盡心力的街坊小店，下次大家不妨留意身邊默默用心經營的小店吧！
記者：李文傑、謝頌昕