密切注視政策變動同留意政策討論係本研研究員嘅日常工作，適逢近日立法會正審議財政預算案，研究員留意到唔少議員以「質詢包裝妙計」，向政府出謀獻策，其對政策嘅想像力，值得大眾欣賞：
起奶爸奶媽館3D餵熊貓？
就着熊貓旅遊方面，善用創新科技建立一個類似「奶爸」「奶媽」館讓旅客去模擬照顧幼崽等技巧──陳學鋒
講起「奶媽」令唔少香港人諗起林鄭，翻查資料先知原來係內地繁育基地嘅飼養員別稱。不過既然熊貓嚟自內地，「奶爸」「奶媽」概念又嚟自內地，嚟香港嘅遊客大部份亦嚟自內地，喺香港複製內地既有嘅東西，嚟吸引主要是嚟自內地嘅旅客，呢個係咩市場定位？同有幾大效益？另外，點用創新科技學餵熊貓BB？既然唔係真實體驗，吸引力又可在？
唔賠錢齋賠「房票」幫大家上樓？
引入更多元化的收地模式，例如「換地權益書」、「房票」等補償方案，以加快解決新發展區(尤其是北都)的土地徵用問題──周文港
喺香港「票房」就聽得多，「房票」真係比較少。原來「房票」係內地唔少地區收地清拆後嘅補償工具，透過賠償有期限嘅買樓優惠票券，取代真金白銀賠償，再焗受影響者用返嚟買樓，同時喺內地都造成唔少房票被拎嚟炒賣嘅現象，究竟議員有無做足功課考慮過如何杜絕其背後可能帶嚟嘅問題，再提出建議？
送道路命名權吸引到企業投資？
成立「北部都會區道路命名委員會」，將道路命名權以「先到先得」模式授予對發展作出重大貢獻的企業， 這不僅能增強企業的社會責任感，還能吸引更多企業積極參與北部都會區的建設──尚海龍
根據《公眾衛生及市政條例》，道路命名屬政府權力，將權力賦予私人企業或牽涉修例，是否合理、如何規管係個大問題。將道路命名為「華為路」、「阿里巴巴道」，市民又可否接受？「先到先得」嘅道路命名權竟然能作為吸引企業投資發展嘅誘因（而非香港本身嘅吸引力），若果咁簡單能吸引數以千億投資，議員大可建議將模式擴充到所有社區設施、一花一木，吸引萬億以上投資， make Hong Kong great again。
輸入內地綠電就減到成本？
政府是否可在一定前提條件下，以低地價或零地價的方式，吸引跨國公司在北都建設區域總部；對於未來算力中心、半導體製造等戰略性產業建設，是否在北都考慮建設能夠輸入內地綠色低價電力的專用設施，以降低企業生產成本 ──嚴剛
首先議員假設咗北都創科園區喺做生產為主，所以關心電力價格問題。但若然要量產，香港不可能在成本上競爭，就算輸入內地綠色低價電力在港生產，亦不可能比內地企業在內地用內地綠色低價電力生產平。想再降低成本，唔通要以低地價或零地價嘅方式送地畀跨國公司？環顧全球各種想複製矽谷經驗嘅創科園區，唔少都透過低地價或零地價「鬥cheap、鬥賤」方式以為能夠吸引跨國公司「落戶」（而非前景或吸引力），但獲取優惠後唔少投資都無實質兌現（如南韓首爾松島），創科園區亦走向爛尾。
返大灣區買鬼城做公屋？
應該研究在大灣區內地城市收購閒置待售的私營房屋作為公屋用途，吸引公屋長者落戶大灣區養老，置換其在港居住的公屋，並相應地減少在港的「簡約公屋」和過渡性房屋的建造──嚴剛
大灣區買樓其實都唔係新建議，過往有政界人士提議例如向雅居樂買樓喺肇慶起「香港城」、借桂山島填海建屋俾80萬人住。但想喺大灣區養老嘅公屋戶本身都可以自己移居，就算喺內地有公屋屋邨，試問有幾多長者願意放棄在港居所，無回頭路地落戶大灣區，抑或要政府強制要求佢哋搬返內地交返個香港單位出嚟？呢項政策究竟係想幫香港居民安居，定係想幫內地接手返啲空置鬼城，真係只有議員自己清楚。
搵「關愛隊」宣傳防騙？
尋找關愛隊的協助在社區深入推廣防電騙的信息──黎棟國
關愛隊一向被質疑作用不甚顯注，定位模糊，亦缺乏專業知識、社區網絡同在地資訊，取代解散互委會留下嘅空隙。依家連原本應該由警方負責提防電騙嘅宣傳工作，都建議搵關愛隊幫手深入推廣，究竟佢哋係咪真係有能力，解釋電子騙案嘅犯案類型以及防範策略？近年有咩新社區問題，解決方案都係搵關愛隊，若關愛隊真係足以勝任解決電子騙案、社區糾紛、舊樓滲水、火災救援等等，或許能取代半數政府部門職能，解決財赤。
以上提問僅屬冰山一角，想必有更多更有趣建議尚待大家發掘。此類提議明顯十分膚淺，不能深入政策問題本身，甚或根本誤判政策問題根源，根本無增進官員對政策問題嘅理解，浪費立法會資源。
若果議員有做好功課，知道政策源流同背景；或者有洞察力認清具體嘅政策現況同問題，能精準對應問題核心質問官員同獲取進一步政策資訊；或者經過深思熟慮，唔好將香港外（幾乎都係內地）嘅做法去脈絡化咁搬字過紙；或者唔好再視乎近來官場流行講什麼，就鸚鵡學舌般喺質詢環節將舊瓶包裝為新酒，相信香港官場嘅議政質素，或許有暫停惡化嘅希望。
（本網歡迎各界投稿，文章內容為作者個人意見，並不代表本網立場。）